Footer

Ket naparagsak dagiti ubbing iti gingginget ti bantay

Nairaman iti umuna a grupo da Stephen ken Yts, agraman dagiti sumaglilima nga estudiante ti Bannuar-Moran.  Kaduada ni Bong Apostol a mannursuro iti Amarao National High School iti Santa Cruz  ken dagiti sumagmamano a bumarangay nga indauluan da Kapitan Danny Arciaga ken ni SBM Gumangi a nagassiw iti kinarkarton a regalo.

Kakuyogda ti maysa a soldado a nagserbi payen a guide.

Naikuyog iti maikadua a grupo da station manager Arlon ken ni Stephen, dagiti dadduma nga estudiante ti Bannuar Moran, ti guide nga Army ken bumarangay.  Kumankantiaw ni Manong Willy ta naud-udida.

Adda iti maikatlo a grupo ni Madam Effy a nakasuot iti uniporme ti soldado.  Naisem latta ni Ma’am uray nabannog ken pirmi’t ling-etnan.

Ti maikapat a grupo ti yan ni Racquel Laranang a kinadkadua ni Jeff Barredo, dagiti estudiante ti Bannua-Moran ken dagiti  soldado a nagbalin a securityda.

Kadagiti pada a lallaki, naganas ti magna uray nasurok sangapulo a kilometro ti daliasaten.  Awan nalabsanmi uray maysa a balay.  Imbag la ketdin ta adu dagiti napipintas a kaduami a kapatpatangmi bayat ti panagnami.  

Kuna dagiti bumarangay a maymayat iti rabii  a pannagna ta nalamiis ti aglawlaw, dika unay mabannog.  Ngem no aldaw, agling-etka a magna gapu iti bara ti init.

Ti sitio Kinbilibil

Sinabatdakami dagiti grupo ti nataengan ken ubbing a nakamasngaad iti paraangan ti balay a naaramid iti natablon a kayo a narra, sagat ken dadduma pay.  Adda isem iti matada ken nadayaw dagiti sinangbayanmi. Adda maibagasan a panagraemda kadagiti kasangsangpet a grupo.  

Naammuanmi a sangapulo ket uppat laeng ti bilang dagiti balbalay ditoy iti sitio Kinbilibil. Sangapulo ket pito met ti rehistrado a pamilia iti purok. Dayta ti gapuna a nairaman ti Linggaoa ken Kinkoop tapno ad-adu ti maserbian ti grupomi.

Dagiti kingki ken  lampara ti silaw iti rabii ta awan pay laeng ti koriente a dumanon ditoy. Nupay kasta, addan dagiti nakawayat a linia.  Adda kano generatorda idi a patarayenda laeng iti rabii (adda batang tunggal pagtaengan a gumatang iti gasolina) ngem manipud idi ngimmina ti magastosda, didan nagsilsilaw.

Adda iti daya ti sitio ti dakkel a bantay a nagtubuan ti naraber a kakaykayuan.  Kuna dagiti agindeg nga adda pay laeng dagiti atap nga ayup kas dagiti sunggo nga agay-ayam iti ungto dagiti kawayan ken kayo, dagiti alimaong a maysa kadagiti karigatan a tiliwen ta nakakutukot iti daga, ken alingo a maanupan laeng no panagtutudo.  Adda pay aggatol wenno atap a kappi, pikaw wenno atap nga aba ken dadduma pay.

Naipattopattok dagiti kataltalonan iti nadumaduma a paset ti bantay. Saan amin a paset ti kabanbantayan ket mabalin a talonen.  Adayo unay iti sitioda dagiti dadduma a suksukayenda a talon.

Sa laeng bumaba dagiti agindeg iti patag no adda gagaraenda a gatangen aglalo la unay dagiti kangrunaan a kasapulanda ti inaldaw a panagbiagda. Saanda ketdi nga agparikut iti bagas ken  prutas.

“Addakamin ditoy idi kalpasan iti gubat,” kinuna ti maysa a baket a nagsaludsodanmi. Saan kano a nakaanus dagiti  nagpanggep idi nga aggian iti purok ket pimmanawdan. Saan nga ania a nanayonan ti bilang ti balbalayda ken panagadu dagiti ubbing nupay ganggannaet kadakuada ti programa ti turay a panangkontrol iti panaganak.

Umanay laeng a pakadamaganda  iti damag manipud ti de bateria a transistor a radio.

(Adda tuloyna)

Comments are closed.