Footer

Operasion ni Chavit, saan nga emerhensia, peligroso: Kon. Goulart

VIGAN CITY – Kinumpirmaran ni Sangguniang Panlungsod Member Germelina Singson-Goulart a naopera ni Gov. Luis “Chavit” Singson gapu iti abdominal aneurysm ngem saan a nagpeligro ti biagna a kas iti nagwaras a damag itay nabiit.

Mismo a nagturong ni Goulart iti DWRS radio station ket inwaragawagna nga adda iti nasayaat a kasasaad, saan a kas iti nagsiwarak a damag ken iti text messages, a nakain-inaka ti kasasaad ti gobernador isu a naitaray iti ospital.

“Addatayo tatta ditoy tapno maipalawagtayo a nalaing ken maisardeng dagiti ispekulasion,” kinuna ni Goulart sana innayon a “nagpatangkamin ken ni Manong Chavit itay bigat, and he is recovering very, very well… Tattay bigat, nagna payen.”

Kinuna ni Goulart a saan nga impakpakaammo ni Gov. Singson iti pamiliana, uray ken ni SPM Jerry Singson iti iseserrekna iti ospital idinto a nagkuyogda pay a nagpa-Manila antes ti operasion.

“…Dina kayat a madanagankami because in his mind, awan met ti peligro, saan met nga emergency daydiay nga operasion,” kinuna ni Goulart.

Inlawlawag ni Goulart a regular nga agpa-check-up ni Singson tunggal innem a bulan ket iti naudi a panagpa-check-upna, nairana nga adda ni Dr. Garcia a nangiwayat iti heart by-pass operation kenkuana iti Amerika ket iti pannakaeksamenna, naduktalan nga adda dua a bukol iti tianna.

Kinuna ni Goulart nga imbaga ni Dr. Garcia iti gobernador a saan met a masapul ti emerhensia nga operasion iti naduktalanda ket agsipud ta agpa-Amerika ti doktor, itinton panagsublina ditoy pagilian nga iwayatda ti operasion.

Ket itay Peb. 6, ti pannakaiwayat ti operasion iti naduktalan nga aneurysm iti tian ti gobernador, segun iti konsehala.

Innayon ti konsehala a namnamaenda a rummuar ni Singson iti ospital kalpasan laeng ti sumagmamano nga aldaw.

Kinunana pay nga imbaga ti gobernador a mangiruar iti opisial nga statement mainaig iti salun-atna apaman a rummuar iti ospital ken ipilananton iti Commission on Elections ti kandidaturana para senador iti masungad nga eleksion.