Footer

P50,000 gunggona makaitudo ayan mapukpukaw a kapitan

CANDON CITY – Nangipasa ti konseho ti siudad iti maysa nga ordinansa a mangitanggaya iti gunggona iti asinoman a makaited iti impormasion no sadino ti yan ti mapukpukaw a kapitan ti maysa a barangay ditoy.

Kinuna ni Konsehal Julio Acance, autor ti nasao nga ordinansa, a nangilatang ti sangguniang panlungsod ditoy iti P50,000 a gunggona iti asinoman a makaited iti impormasion no sadino ti yan ni Kapitan Laureano “Berto” Galicia ti Tablac, Candon City, Ilocos Sur.

“Siasinoman a makaited iti impormasion iti lugar nga ayan ni Kapitan Berto, no kas pangarigan sibibiag pay ket magunggonaan iti P50,000,” kinuna ti konsehal.

Segun iti konsehal, aggapu ti nasao a gatad iti Office of the Mayor, ket mairuar daytoy kalpasan a masigurado a pudno ti impormasion nga aggapu iti informant.

Naudi a nakita ni Kapitan Berto Galicia a naglugan iti motorsiklona a maris asul idi Oktubre 13 itay napan a tawen ket manipud idin, saanen a nagsubli iti pagtaenganda.

Adda rimmuar nga sayangguseng a pinapapatay ti maysa a grupo ti nasao nga opisial ngem saan a kumpirmado ti damag. (Danny Antalan)

Comments are closed.