Footer

P75-M pategna a mula a marihuana, napag-ot, napuoran iti beddeng Benguet, I. Sur

SUGPON, Ilocos Sur – Sabali manen a plantasion iti nagbeddengan ti Kibungan ken Bakun, Benguet ken daytoy nga ili ti rinaut itay Peb. ti nagbulig a bunggoy ti Philippine National Police ken Philippine Army     ket pinag-ot ken pinuoranda minilion ti pategna a mula a marihuana.

Mapattapatta nga agpateg iti agarup P75 million dagiti napag-ot a mula a marihuana a naimula iti 12.5 ektaria a plantasion.

Kanaig daytoy, mismo nga inatenderan da Police Chief Supt. Leopoldo Bataoil, regional director ti PNP Region 1, Col. Loreto Rirao, commanding Officer ti 503rd Infantry Brigade a masarakan iti Narvacan, Ilocos Sur, Col. Harold Cabreros, commanding officer ti 50th Infantry Brigade ti 503rd Brigade ti Philippine Army, Mayor Fernando Quiton ti Sugpon, ken ni P/Insp. Greg Guerrero, hepe ti pulisia,  ken dadduma pay a residente ken opisial ti gobierno ken polis, ti seremonial a pannakapuor dagiti naibaba a mula a marihuana iti sanguanan ti municipal hall ditoy.

Dinayaw ni Bataoil dagiti umili gapu iti panangitedda iti impormasion para iti  pannakatakuat iti nasao a plantasion ti marihuana.

Indagadag ni Bataoil ti panagtitinnulong dagiti umili ken polis tapno mapugipog ti maiparparit a droga ken ti “panagsardeng dagiti agmulmula iti marihuana ta  adu a problema ti ipaayna.”

Kinuna met ni Col. Rirao a posible nga imanmanehar dagiti komunista a grupo ti nasao a plantasion.

“Isaysayangkat dagiti komunista daytoy nga aramid tapno maaddaanda iti resources.   Ti ayanna a dakes, illegal daytoy ken makaperdi iti salun-at, kinuna ni Col. Rirao.

Kabayatanna, kinuna ni Mayor Quiton a ti marihuana ti maysa kadagiti kayatda a mapaksiat iti ilida agsipud ta    saan laeng a ti salun-at dagiti tao ti dadaelenna no di pay mairamraman a madadael ti nagan ti ilida.

“Isu nga isaysayangkatmi ti information dissemination kadagiti umili tapno maammuanda ti dakes nga epekto ti droga,” kinuna ti mayor idinto nga inyunay-unayna a saan nga iti masakupan ti Sugpon ti pakaimulmulaan dagiti marihuana  no di iti tri-boundary ti munisipio ti Kibungan, Bakun ken Sugpon.

Naikkan iti medalia ken sertipiko ti pammadayaw dagiti polis ken militar a nangisayangkat iti pannakaraut iti nasao a plantasion ken  pannakapag-ot ken pannakapuor dagiti mula a  marihuana.