Footer

$200,000 a mobile clinic, agserbi addaan an-annayen iti mata, lapayag

CANDON CITY – Maysa a mobile clinic ti napaadda babaen ti initiatibo ti Lions Club a nakabase  iti Kansas City ken ditoy siudad tapno maaramat para kadagiti addaan iti sakit iti mata ken panagdengngeg.

Mismo a ni Mayor Allen Singson ti kangrunaan a sangaili iti pannakabendision ti nasao a mobile clinic nga agpateg iti $200,000 (aganay a P10 million) a tinabunuan met ni Dr. Modesto Pacquing, sigud a governor ti Lions Club ti District 301, ken dagiti nadumaduma nga opisial ken kameng ti Lions Club International agraman dagiti opisial ti siudad ditoy.

Napaadda daytoy a klinika a mapattapatta a kaunaan iti pagilian babaen ti initiatibo ni Dr. Modesto Pacquing, sigud a governor ti Lions Club ti District 301, Candon City, ken itutulong ti  Kansas City World Outreach Medical Mission Foundation ken Lions Club District 26G.

Naigiddan met a naisayangkat ti medical mission a nangipaayan dagiti doktor iti libre a serbisio ti salun-at kadagiti umili, nangruna dagiti agsagsagaba iti sakit ti lapayag, karabukob, ken mata iti agarup sangaribu a pasiente, agraman ti pannakaited iti libre nga agas ken anteohos kadagiti pasiente.

“Kalpasan ditoy Ilocos Sur, mapan ti klinika idiay Bicol partikular iti Tabako, Albay ken Legazpi City ket agtalinaed ditoy iti 10 nga aldaw tapno maserbian dagiti kakailian idiay a makasapul iti tulong,”  kinuna ni Dr. Pacquing.

Addaan ti mobile clinic iti screening section kas koma ti Computerized Autofraction and Kerametry, Slitmap microscopy, indirect opthalmoscopy ken biometry para iti mata ken  computerized audiometry and tymparometry, video endoscopy para iti mata, agong ken karabukob, ken NP endoscopy para iti lapayag.  

Addaan pay daytoy iti hearing booth, ken kuarto a pakaoperaran ti pasiente.