Footer

Agtaktakaw para pallot a manok, nanabtuog

BANTAY, Ilocos Sur – Mapapati a natukkolen ti sindikato nga agtaktakaw iti para pallot a manok iti probinsia iti pannakatiliw ti dua a lalaki iti dragnet nga insayangkat ti polis ti Santa ken daytoy nga ili.

Napilaan iti provincial prosecutor’s office iti kaso a theft da Dennis Ferrer, 47, naasawaan, drayber, residente iti Malaya, Tondo, Manila ken Ernesto Felicilda, 33, naasawaan, agnaed iti Sampaguita  St., Tondo, Manila ken ti kaduada a nainaganan a Jojo.

Iti inisial nga inbestigasion ti polis, naduktalan a nakarehistro ti Toyota Vios a luganda iti maysa nga Ernesto dela Cruz, residente iti San Miguel  St., Mandaluyong City.

Narekobre manipud iti lugan ti 26 a para pallot a manok a naikabil iti abaka a basket, 65 pedaso a babassit a kawayan a natiradan, ken dua a selpon.

Natiliw da Ferrer ken Felicilda iti inwayat ti polis ditoy a checkpoint kalpasan a nakaawatda iti pakdaar manipud iti Santa PNP nga agturong iti hurisdiksionda ti maysa a Toyota Vios a mapapati a naaramat a gateaway car iti napalabas a panagtakaw iti para pallot a manok a naisayangkat iti dua a barangay ti Santa.

Nakalibas ti kaduada a nainaganan laeng iti Jojo.

Sakbayna, maysa a tip ti naawat ti polis Santa manipud iti maysa a residente a nakitana ti nasao a lugan dagiti agtaktakaw iti teksas a manok a limmabas iti lugarda.

Maipalagip nga idi Agosto 28 ken Nob. 12 idi napan a tawen, nasurok a 40 a fighting cocks nga agpateg iti P440,000.00 ti natakaw iti Sacuyya Norte ken Manueva, Santa, Ilocos Sur.

Iti pannakaisurat daytoy, di pay ammo no naggapuan dagiti manok a narekobre dagiti polis iti lugan dagiti suspetsa.