Footer

Ammo ti Ina ti Kasasayaatan (Umuna a paset)

“Bakit po kayo di umiimik?” sinaludsod dagiti agkakabanuag iti lakay a kaabayko.

“Ngayon lang ako nakapunta ng Baguio, mamamatay pala ako ng ginaw,” kuna ti lakay a nakakumeg.  Nakasuot iti napuskol a jacket ken nagbonete. Agtigtigerger iti lamminna. Kalam-ek la unay ti Siudad ti Baguio ita, 9.8 degrees Celsius.

“Pumasok na lang po kayo sa loob. Mas mainit doon. Kaya lang baka wala na kayong maupuan…” impatigmaanmi. Ti uneg ti simbaan ti  Our Lady of Lourdes iti Kisad Road Road ti kayatmi a  sawen. Pagtapuakan ngamin ti angin ti lugar manipud iti kakaykaywan iti abagatan. No agangin, umuna a makay-aban ti simbaan, isu a nalam-ek ken naangin. 

Idi laeng napan a tawen a nagbalin a parokia a buklen iti sangapulo a barangay iti aglawlawna. Sigud a kukua dagiti Avancena-Quezon ti lote ken bassit a tarikayo a balay. Naipatakder ti grotto idi panawen ni Pres. Manuel Quezon iti sikigan ti  balay. Adda daytoy iti rukib ti dakkel a bato. Idi a panawen, adda nangirugi iti panagnobena a kas debosion iti Our Lady of Lourdes. Sipud idin, napasamaken ti tinawen a nobena ditoy a lugar nga isu met ti patron manipud iti Peb. 2 agingga iti Peb. 11  ken kaaldawan payen ti piesta ti barangay a makinsakup itoy: ti Burnham-Legarda Barangay. Bassit laeng ti malaonna iti uneg isu nga iti ruar ti yan dagiti kaadduan a makimisa. Adda tolda a linong ken tugtugaw. Isu a no agtudo, agpayongen dagiti makimisa. Adda pay dagidi panawen a mapayongan met ti padi a mangmisa ta iti pay laeng ruar a mangmisa. Duapulo metten a tawen a dumardar-ayak iti daytoy a nobena.

“Kaya ko pa siguro ito,” insungbat ti lakay kadagiti kakaduana.

“Kung umuulan naman, nagpapayong kami dito sa labas. May panahon pang bumabagyo noon, walang problema  kung mabasa,” pinerrengko.

Kasla  di mamati. Kasla dina  patien a kasta ti kinapinget dagiti Marian devotee iti Baguio. Nagtungtung-ed laeng. Saanen a nagtimtimek.

Agingga a nangrugi ti Santo Rosario a sinaruno ti Nasantuan a Misa.

Apay a kastoy ti kinapinget dagiti deboto, agib-ibtur iti lam-ek ken pannakabasa met iti panagtutudo?   daytoy ti nalabit adda iti panunot ti lakay. Nalabit a sungsungkaenna no di man  rukrukodenna ti kinaadalem ti pammati dagiti deboto.

Ammo amin dagiti inna ti kinaimbag a pagsayaatan dagiti annakna. Ammo dagiti  inna  iti pamilia ti pagsayaatan dagiti annakda. Ammo ti Nainlangitan nga Ina ti pagsayaatan dagiti annakna.

Iti pannakairakurak iti kaunaan a  dibinidad (divinity) ni Apo Jesus, ammo ni Ina Maria ti kasayaatan amin a para kadagiti tao.

Ti napasamak iti maysa a kallaysa sadiay Canai ti kaunaan a milagro nga  inaramid ni Jesucristo. Pinagbalinna a naimas nga arak dagiti binurnay a danum.

Saan koma  pay a kayat ni Jesus ti agmilagro, ta kas kunana: “Saan pay a napapanawen” ngem ammo ni Ina Maria ti pagsayaatan dagiti agkallaysa, dagiti agpasken ken dagiti  dimmar-ay.

Iti kinaawanen ti arak, nasken nga adda maiserbi, isu a kuna ti Nainlangitan nga Ina: “Aramidenyo amin nga  ibagana…”

No iladawantayo ti pasamak ken dayta a balikasna nga “Aramidenyo amin nga  ibagana…” kaipapanan dayta a ti ina ti mangibalballaet iti pagsayaatan ti tao. Isu ti makunkuna a Mediatrix of graces .

 Kastoy ti marikrikna dagiti deboto,. Awan ti aniamanna ti lam-ek ken pannakabasa. Kaskenan ti pannakatungpal dayta nga “Aramidenyo amin  nga imbagana…”

Saan a kinakomportable ti isusurot ken Jesucristo. Saan a biag a kinanam-ay. Saan a biag nga awanan iti pakasuotan iti pammati.

Ti pudno a sumursurot ken Jesucristo ket nasken nga aramidenna amin a pagayatan daytoy. Ta  kas kunana: “Asinoman a mayat a sumurot kaniak, nasken a baklayenna met ti bukodna a sangol…”

Ngarud, saan a komportable ti panangsurot ken Jesucristo. Saan a kinakomportable ti mangaramid iti pagayatan ni Jesucristo. Timmao ni Jesucristo, naparigat, nagtuok, nailansa iti krus. Kadagiti mayat a sumurot, nasken met a “mailansada iti bukodda a krus ken baklayenda ti bukodda a sangol.

Napipia pay dagiti deboto (iti Baguio) ta mabbasada laeng ken makarikna iti lammin iti las-ud ti nasurok a maysa  nga oras. Ngem kadagiti sabali a Kristiano, agsagsagabada iti nakana a bisin.

Agsagsagabada iti kinadangkok ti gubat. Agsagsagabada iti angol ken kinainhustisia. Agsagsagabada iti nakana a sakit. Agsagsagabada iti pannakapapatay. Dagiti dadduma, addada iti impierno a mangipadpaduyakyak iti “pagayatanna.”

(Adda tuloyna)

Comments are closed.