Footer

Ket naparagsak dagiti ubbing iti gingginget ti bantay (Maudi a paset)

NAAMMUANMI nga immalisda iti daytoy a lugar idi dinalapus ti epidemia ti nagdappatanda a barangay. Segun iti maysa nga agindeg, kasla angol ti nangsalapon kadakuada. Kaipumpunpon ti maysa, adda adda manen sumaruno a matay.

Maigapu iti daytoy, pinanawanda ti Mapalina ket nagbangonda iti pagtaenganda iti sabali a lugar. Dita a bimmangon dagiti sitio ken barangay kas iti Kinbilibil, Daligan, Kinmarin, Kinnayad ken dadduma pay.

Ti Boodle Fight

Idi makasangpet aminen dagiti grupo, naikkanda iti gundaway a makiam-ammo iti tunggal maysa (kaadduan ngamin ket damoda met laeng a makapagkikita), ken makidinnamag kadagiti agnanaed ditoy.

Naammuanmi a manipud iti kaasitgan a sitio Linggaoa, trenta minutos ti pannagnada tapno makadanonda ditoy Kinbilibil. Iti Kinkoop ti nakaipasdekan ti pagadalan iti primaria. Kadagiti agbasa iti high school bumabada iti barangay Amarao iti Santa Cruz.

Iti pangngaldaw, naisagana dagiti taraon iti estilo ti militar – boodle-boodle fight. Naidasar ti innapuy iti atiddog a lamisaan a naparabawan iti bulong ti saba ket naiparabaw dagiti tallo a klase a sidaen. Iti pannangan, likmuten ti grupo ti lamisaan. Awan ti kutsara ken tinidor. Agkammet amin.

Nakaay-ayat ta uray da Madam Racquel, Madam Effy, ken dagiti napipintas a babbalasang ti Bannua-Moran ket nagkammetda. Nagmayat gayam ti sumangbay a rikna no awan ti nangato ken nababa.

Batognan, ibbusennan. Nabisinankamin sa iti bannogmi a nagna ta dandanimi naibus ti batogmi. Linnetlet ngem kasla nasam-it man ti taraon iti daytoy a gundaway. Wenno, naim-imas a talaga no manganka babaen ti ima?

Kalpasan ti pangngaldaw, nairugi ti programa. Imbinsabinsa ni Sgt. Marcelo Garcia ti panggep ti proyekto a pamaskua a napagnunumuan ti kameng ti DZTP, 50th IB ti Army ken LGU ti Santa Cruz ken dagiti naayat a nangipaay iti tulong, suporta ken nagidonar kadagiti pamaskua a regalo para kadagiti marigrigat nga agindeg, kangrunaanna dagiti ubbing iti sitio Kinbilibil, Linggaoa ken Kinkoop.

Nangipaay met iti mensahe da kagawad Uyan ken ni kapitan Arciaga. Nagyamanda ta uray adda iti gingginget ti bantay ti sitio Kinbilibil ket daytoy ti nakita ti DZTP manipud kadagiti nagpilian a lugar a pangipaayanda iti regalo.

Iti mensahe ni 1st Lieutenant Dominador Valerio, civil military for operation ti 50th IB, kangrunaan a dinakamatna ti programada kontra iti insurhensia ket tapno mapukaw daytoy a parikut ti gobierno.

Inyunay-unay met ni station manager Arlon a “ti adal ti sungbat iti kinamarigrigat” ket indagadagna a no makaadalto dagitoy nga ubbing, saandanto koma a liplipatan a taliawen ti naggapuanda, wenno agsublidanto koma iti surong a naggapuanda.

Kinunana a nainspirar a mangipaay latta iti tulong kadagiti adda iti gingginget agsipud ta mariknana ti kasasaadda ta nagtaud met iti kasulinekan a barangay ti Ilocos Sur.

Kalpasan dagiti mensahe, naiwaras dagiti naisupot a regalo kadagiti ubbing. Mailadawan iti rupada ti nagpaiduma a ragsakda nga umawat ti regalo.

Agpababan ti init idi agpakadakamin. Nalag-an ti riknami a simmalog ta ammomi a nakaipaaykami iti ragsak, uray sangkaballing laeng, kadagiti ubbing ken agindeg iti Kinbilibil, Linggaoa ken Kinkoop.