Footer

Makatikaw a politika

Makapadismaya ken nakiro ti politika ditoy pagiliantayo a pakaulawan ken pakatikawan dagiti ordinario nga umili.

Kitaentayo dagiti sumaganad:

  • Iti daytoy nga eleksion a naggadu dagiti kandidato a para senador. Segun iti Commission on Elections, adda 78 a nagipila iti kandidaturada. Tallo dagiti artista ken TV personalities a pakaibilangan da nag-senador Tito Sotto, Loren Legarda, ken Richard Gomez. No lumsot dagitoy, mainayonda kada Sen. Jinggoy Estrada, Lito Lapid , ken Bong Revilla. Dakkel ngarud ti posibilidadna nga agbalin ti Senado a dakkel a telenovela a pakaray-awan dagiti umili.
  • Kaadduanna dagiti front runners a kandidato ti kameng ti pamilia ti napeklan a politiko wenno naaddaan iti nangato a pagtakeman iti gobierno.

Kas pagarigan ni Koko Pimentel III, anak ni Sen. Aquilino Pimentel, ket no mangabak, agkaabaydanto nga agama iti Senado.

Ni nag-senador Tessie Oreta, kabsat daydi nagsenador Benigno “Ninoy” Aquino ken ni Benigno “Noynoy” Aquino III a kaanakanna, adda pasibilidadna nga agludonda iti Senado, kas iti panagludon dagiti agina a Jinggoy Estrada ken Loi Estrada, anak ken asawa ni nag-presidente Joseph Estrada iti kallabes a Senado. Naimbag ta saanen nga agpailayon ni Loi Ejercito ken nakumbinse ni Erap ni Mayor ti San Juan JV Ejercito ta di dakkel koma a pakasaritaan iti politika ti kaadda ti tallo nga Estrada iti Senado.

  • Saanen nga ammo dagiti umili no adda iti oposision wenno iti administrasion dagiti kandidato.

Kas kada Oreta ken Sotto, nainget a kritiko ni Pres. Arroyo, idi awan ti pakaibislinanda iti United Opposition, bimmallasiwda iti National People’s Coalition ket daytoy ti behikulo a naglugananda tapno mairamanda iti Unity Ticket ti administrasion. Pimmanaw met ni Richard Gomez iti UNO ket nakisarsarita iti Unity Ticket ket idi awan latta ti pakaibislinanna, nagtarayen a kas independiente.

Uray ni Sen. Edgardo Angara, kimmappon metten iti Unity Ticket uray iti baet nga isu idi ti Executive Secretary ni Estrada.

Dagiti met makunkuna a Wednesday Group a pakairamanan da Sen. Manny Villar, Francis Pangilinan, Joker Arroyo, ken Ralph Recto, nagsisinadan iti dalan ngem “iti daytoy laeng nga eleksion.”

Agtaray da Villar ken Pangilinan nga independiente, ngem nairamanda iti United Opposition, idinto a kimmappon da Recto ken Arroyo iti Unity Ticket.

Adu ti ngimmato ti kidayna iti nagbalin a desision da Recto ken ni Arroyo ta ti administrasion Arroyo ti adda iti likudan ti tignay a pannakapukaw iti Senado ken ni pay Arroyo ti timmakder a nangited iti argumento iti Korte Suprema maikontra dagiti saan a konstitusional a proklamasion ken pammilin manipud iti ehekutibo.

Nagbalin a praktikal da Recto ken Arroyo iti ikakapponda iti Unity Ticket – kasapulanda ti makinaria ti administrasion para iti daytoy nga eleksion.

Masipsiputan ngarud no kasano ti panangawat dagiti botante iti panagtakder iti maymaysa nga entablado dagiti kandidato a nangiyik-ikkis iti panaglusulos ni Pres. Arroyo ken dagiti nangsalsalaknib iti Presidente

Manamnama met ti panagsisinnulot, panagpipinniltak ken trinneydoran dagiti kandidato bayat ti kampania tapno maarosanda dagiti kasalipda.

Kuna ti Simbaan a kasapulan a naurnos, natalna ken nadalus daytoy nga eleksion nga agbalin a reperendum ti agdama a turay.

Makunami met iti baet ti agdama a makadismaya a panagtaray ti politika: barbarengli… barbarengli…

Comments are closed.