Footer

Mamonitor, negosiante nga aggatang iti tabako iti Sta. Lucia

SANTA LUCIA, Ilocos Sur – Tapno masigurado a saan a maipanaw ti produksionna iti tabako, ingetan ti gobierno munisipal ti pannakasiput dagiti negosiante nga aggatang iti naluto a bulong ti tabako kadagiti nadumaduma a barangay ditoy.

Daytoy ti kiniddaw ni ABC President Sotelo Avila bayat ti naudi a regular a sessionda iti Sangguniang Bayan ditoy.

Kinuna ni Avila a masapul a mamonitor dagiti traders a sumrek iti Sta. Lucia nga aggatang iti tabako nangruna dagiti naggapu iti sabali nga ili ken probinsia tapno malapdan ti pannakaipanaw ti produksion ti tabako ditoy.

Kinuna ni Avila a masapul a mangala dagiti traders iti permit iti munisipio nga aggatang iti tabako ket mairekord dagiti bulto a gatangenda iti papananda a barangay tapno   mairekord a produksion ti ili, iti kasta, di makissayan ti agbalin a bingay ti munisipio manipud iti excise tax kas sagudayen ti R.A. 71717.

Ti produksion ti maysa nga ili ti pagibasaran iti maited a bingayna manipud iti R.A. 7171.

Dinakamat ni Avila nga adda dagiti negosiante a mapan aggatgatang iti ilida nga aggapu iti Bangar ken Balaoan, ket no awan permit dagitoy,   saan a mairekord ti kaadu ti nagatangda iti Santa Lucia ket maipanawda ken agparangton a produksion ti La Union.

Kas resulta, makissayan ti produksion ti Sta. Lucia idinto a mainayonan ti naipanaw a tabako a produksion ti nasao a probinsia a pakaigapuan iti idadakkel ti bingayna iti excise tax manipud iti R.A. 7171, segun iti ABC President.

Kinuna ni Vice Mayor Estrella Hernaez a kiddawenda ti tulong iti National Tobacco Administration para iti daytoy a banag.