Footer

Polis a karaman iti kriminalidad, madusa – Bataoil

SUGPON, Ilocos Sur – Imballaag ti regional director ti Philippine National Police  a paimbestigana dagiti polis a nairaman kadagiti maikaniwas nga aramid.

“We will never tolerate any wrong doing ng ating mga pulis,” kinuna ni ni P/Chief Supt. Leopoldo Bataoil bayat ti interbio kenkuana ti DZTP ken Tawid News Magasin.

Nagturong ditoy ni Bataoil, karaman ti sumagmamano nga opisial ti PNP ken militar tapno imatanganda ti ceremonial burning dagiti napag-ot a mula ti marihuana manipud iti 1.2 ektaria a plantasion iti nagbeddengan ti Kibungan, Benguet ken daytoy nga ili.

“Mabuti at maiharap natin sa husgado kung sinoman ang mga involved na mga ito para mabigyan sila ng due process in court,” kinuna pay ni Bataoil.

Kinunana a kayatna a makita nga aramiden dagiti polis iti region 1 ti trabahoda, kas koma ti law enforcement nga awan ti pabpaboranda tapno awan ti  pagbutngan dagiti umili.

“Hindi nila dapat paglaruan ang batas na kanilang pinapatupad,” kinuna ti regional director.

Impasigurado pay ni Bataoil kadagiti umili nga isu a mismo ti mangipatungpal iti pannusa kadagiti pulis a madi ti aramidna.

Maipalagip nga adda  sumagmamano nga insidente iti Ilocos Sur nga adda nakainaigan ti pulis.

Kinuna ni Bataoil a saanna a maipalubos a madadael ti imahe ti kapolisan gapu laeng iti aramid ti sumagmamano.

Kabayatanna, impatalged ni Col. Harold Cabreros, agdama a commanding officer ti 50th Infantry Battalion ti Philippine Army a nakabase iti Guimod Sur, San Juan, Ilocos Sur, a makipagmaymaysada iti pulisia iti panangpugipog iti maiparparit nga agas.

“Supsuportaran ti 50th Infantry Battalion ti bision ti Philippine National Police,” kinuna ni Cabreros idinto nga innayonna a nadeputized a tumulong iti PNP kas iti pannakirupak iti panagraira ti maiparparit a droga.

Kinuna ni Cabreros nga agballigi ti kampania maikontra iti droga babaen ti pannakikammayyet dagiti umili.

Naduktalan ti nasao a plantasion ti marihuana kalpasan ti naawat a report ti militar manipud iti sibilian nga umili nga adda dagiti armado a tattao nga agdakdakiwas iti nagbeddengan ti Kibungan, Benguet ken Sugppon, Ilocos Sur.