Footer

Saan a marijuana town ti Sugpon: kuna dagiti lumugar

SUGPON, Ilocos Sur – Kinondenar dagiti residente ditoy ti kaadda dagiti plantasion ti marihuana iti nagbeddengan ti ilida ken ti Kibungan, Benguet a mangmangted iti dakes a nagan iti ilida.

Imbatad daytoy dagiti umili ken ni PNP Regional Director ti Region I, P/Chief Supt. Leopoldo Bataoil, Col. Loreto Rirao, Commanding officer ti 503rd Brigade ti Phil. Army ken ni Col. Harold Cabreros, commanding chief ti 50th Infantry Batallion bayat ti open forum kalpasan ti ceremonial burning dagiti napag-ot a marihuana iti maysa a plantasion iti nagbeddengan ti dua a probinsia.

Kinuna dagiti lumugar nga iti laeng nagbeddengan ti ilida ken ti Bakun, Kibungan iti Benguet ti pakasarakan kadagiti plantasion ti marihuana ngem no rimmuar a damag iti telebision, radio ken pagiwarnak, ti Sugpon ti kangrunaan a madakdakamat, banag a pakadadaelan ti nagan ti lugarda.

“Made-degrade dagiti estudiante ta no ibagada a taga-Sugponda, maiparupa metten a naggapuda iti marijuana country wenno ‘katas ng marijuana’,” kinuna ti maysa a kameng ti konseho ditoy idinto  nga innayonna nga uray isuda, mababbabalawda no apay a maitulok a ti Sugpon ti agplastar a pakararautan dagiti plantasion ti marihuana.

Kas, sungbatna, kinarit ni General Bataoil dagiti lumugar nga agmaymaysada a mangpaksiat iti marihuana idinto nga indagadagna iti media a tumulongda iti  pannakaiwaragawag iti panangkondenar dagiti residente iti maiparparit a droga a mangdaddadael iti nagan iti ilida.