Footer

500 NCIP scholars, inawatda kuarta nga abastoda

CANDON CITY – Impakaammo ni Diputado Eric Singson a manayonan ti  bilang dagiti eskolar manipud kadagiti upland municipalities a pagbasbasaen ti gobierno.

“Gapu ta adu ti nailatang a pundo, nayonak ti sigud a 1,000 nga scholarstayo iti 200 tapno agbalin a 1,200 ket ad-adu a kalugarantayo ti mabenepisiaran,” kinuna ni Singson.

Indagadag ti diputado a nursing ti adalen dagiti 200 a baro nga scholars ta daytoy ti kasapulan dagiti pagilian iti sangalubongan.

Kabayatanna, inawat ti nasurok 500 nga scholars ti National Commission on Indigenous People (NCIP) babaen ti Educational Assistance Program ti gobierno ti kuarta a para iti panagiskuelada iti pagtaengan ti diputado ditoy.

Naiyawat dagiti tseke kadagiti estudiante  nga eskolar manipud iti upland municipalities ti maikadua a distrito ti probinsia iti naangay a simple a programa a tinabunuan dagiti nagannak ken inimatangan ni Congressman Singson, NCIP Executive Director Rosalina Bistoyong, Regional Director Hover Ciriaco, Provincial Director Atty. Marvin Biligan, Bokal Alexander Bistoyong ken dagiti mamayor iti segundo distrito a pakairamanan da Mayor Elena Sorio ti Banayoyo, Mayor Jaime Asiong ti Quirino, Mayor Lorenzo Bragado ti San Emilio, Mayor Gilbert Ciriaco ti Gregorio del Pilar, Mayor Elpidio Bistoyong ti Suyo, Mayor Allen Singson ti Candon City ken Mayor Jesus Sagay ti Lidlidda, Ilocos Sur.

Immawat dagiti dadduma nga estudiante iti dua a tseke nga aggatad iti P2,600 ken P2,900 para iti panagbasada iti umuna ken maikadua a semestre idinto a maysa a tseke ti inawat dagiti first year students.

Kinuna pay ni Singson nga it-ited ti gobierno ti suporta kadagiti agtutubo nangruna dagiti agnanaed iti upland municipalities tapno maikkanda iti naraniag a masakbayan.

Inlawlawag met ni Director Bistoyong a naitantan ti pannakaited ti tseke agsipud iti inruar nga isyo da Senador Franklin Drilon ken Senador Juan Flavier a saan a mapmapan ti scholarship assistance kadagiti kameng ti tribu.

“Mapmapan kano daytoy kadagiti kayat nga ikkan dagiti congressman. Of course, we deny daytoy a pammabasol ta kamengtayo iti tribu dagiti Kankanaey ken Bago no datayo koma ditoy Ilocos Sur,” kinuna ni Bistoyong.

Inlawlawag met ni Biligan a nairanta daytoy a programa ti NCIP-EAP  a maited kadagiti kameng iti tribu iti Ilocos Sur nga aggapu ti pundo manipud iti Countrywide Development Fund ni Cong. Eric Singson.

Kinunana a sakbay nga agbalin nga iskolar ti maysa nga agtutubo, masapul a paneknekanna a kameng ti Bago, Kankanaey wenno Tingguian.  

“Saanna kayat a sawen a no agnanaed ti maysa nga agtutubo iti upland municipalities ket mabalinen nga ag-avail iti scholarship,” kinuna ni Biligan.

 Kinunana a masapul  a maipasa dagiti iskolar dagiti subjectsda tapno agtultuloy ti financial assistance a maited kadakuada.

Comments are closed.