Footer

Ammo ti ina ti kasasayaatan (Tuloyna)

ASINO ngarud ita ti naim-imbag? Mano met laengen aya dayta  nasurok a maysa nga oras a tigerger wenno pannakabasa?

Kadagiti dadduma a Kristiano iti nadumaduma a paset ti lubong, agtigtigergerda met iti lammin gapu ta awan ti naimeng a pagtaenganda. Agtigtigergerda iti bisin gapu ta awan ti makanda.

Agtigtigergerda iti  buteng ta naikawiten iti tengngedda ti natirad a kumpay ni Patay. Agtigtigergerda a matay.

Nagasat dagiti mabbasa kabayatan ti misa. Iti sibubukel a lubong, manmano ti pasamak a mabbasa ti makimisa. Di kadi sabali nga eksperiensa daytoy a  banag, saan? New experience. Apay ketdin nga agalen ti pannakabasa?  Dagiti mannalon, tapno laeng makatalonda, nasken a mabbasada iti inaldaw, manipud iti agsapa agingga iti malem. Dagiti mangngalap, agpatpatnag wenno agmalmalem a mabbasada tapno laeng adda makalapda. Dagiti mangmangged, dagiti drayber, ken dadduma  pay nga adda iti sektor trabaho,  agmalmalem no di man agpatpatnag a mabbasada iti ling-etda tapno laeng maisakadda ti pamiliada.

Di kadi nagasgasat dagiti deboto ta malammin  wenno mabbasada iti uneg laeng ti nasurok a maysa  nga oras?

Ti Nainlangitan nga Ina ti Mediatrix of graces. Mangibalballaet kadagiti grasia. Ngem no sawirem dayta nasurok a maysa nga oras a pannakarikna iti lammin wenno pannakabasa, kasano koma a maaramidmo ti “pagayatanna?”

“Aramidenyo amin a pagayatanna,” ngem no nagawidkan ta malamminkan ket napanka nagkumeg idiay balayyo wenno nakisiat iti kaarrubam ta kalam-ekna, kasano ngarud a naaramidmo ti pagayatan ti Apo?

Ti pannakaibalballaet ken ni Ina Maria ti kangrunaan amin a rason ti panagdebosion kenkuana. Ta adda aya ina a mangbaybay-a iti anakna?

Sidadaanto latta  nga umarakup ti ina. Arakupenna ti anakna. Itedna amin a pagnam-ayan ken pakaisalakanan ti anak.

Kas anak, asino kadi ti kaunaan a kamangam no panawen ti pannubok? Saan kadi nga iti ina? Kadagiti deboto, saan laeng nga ina iti pagtaengan no di pay Ina a Nainlangitan.  Saraken kadakuada ti bara ti pammateg ken panangilala.

Adda daydiay nabasak idi a maysa a pakasaritaan ti tao. Saan a naibaga no asino ti authorna. Ta kadagiti ngamin kakastoy a pakasaritaan adu dagiti nagputar a saan nga importante ti naganda no di ti pinutarda. Ammo met ti Langit no asino a talaga ti nangputar, saan?

Ti istoria:

Nadadaelen ti lubong. Panungpalen. Natay aminen a tattao. Agiinnunan dagiti kararua a sumrek iti ridaw ti dakkel ken nadaeg a Balay. Ngamin, dandanin agserra daytoy.  No nagserran, awanen ti  makastrek pay.

Ngem adtoy ti maysa a kararua  a tumultulong pay laeng iti padana a kararua. Saanna nga ingginggina ti peggad a marikpan iti ridaw. Tinulonganna  latta dagiti matulonganna tapno makastrek dagitoy iti uneg ti nadaeg a Balay.

Uray idi sibibiag pay, mannakitulong a talaga daytoy. Unaenna ti sabali sakbay ti bukodna a bagi.

Dimteng ti kanito ti panagrikep ti ridaw. Awanen ti makastrek pay a kararua. Tuktokda man a tuktok, saanen a malukatan ta dimtengen ti panawen a pannakaiyabut dagiti itta iti yakayakan. Dagiti saan a nakastrek, isuda ti silnaban ken lamuten ti apuy ket ditadan nga agnanayon. Dagiti adda iti uneg ti inaladan ket isuda ti agsagrap iti kinaagnanayon a kinaimbag. Nairaman iti ruar dayta nalaing a tumulong a kararua.

Ngem imbes nga agpulkok ti kararua, nagkararag ketdi.

Nagkararag ken Ina Maria. Nagpaaklolo ken nagpasaranay: “…toy anakmo, paaklolo ‘ta saranay nga itedmo. Siksika ti pagkamangak, ken sikat’ pakatayak…”

Natapik ti kararua. Ti Nainlangitan nga Ina.

“Saankan nga agsangit. Umayka, umiggemka kadagiti imak…”

“Ina, nagrikepen ti ridaw ti balay….”

“Wen, ammok dayta. Ngem iti kaanoman, saankayo a baybay-an nga annakko. Umayka, ket magnata iti tawa iti likud…!”

No nakarikepen ti ridaw, adda pay laeng ti tawa a sumrekan. Kasta ti pammateg ti Ina a Nainlangitan kadagiti annakna…#

Comments are closed.