Footer

Dagiti pakasaritaan ti naindaklan nga ayat (Umuna a paset)

“ADDAN sa anabaab? Partakak ngarud ta amangan no maabutandak. O mangrisut iti amin a punial! adtoy ti kalubanmo; makapaginanaak iti ipupusayko…” (Maidasay iti barukong ni Romeo.)

Nayulog iti Iluko a maysa kadagiti maudi a linia wenno binatog iti “Romeo and Juliet”, a sinurat ni William Shakespeare, kalatakan ngata a dramaturgo iti lubong. Binagsol ni Juliet ti bagina iti punial ni ipatpategna unay a Romeo agsipud ta nadatnganna daytoy a nagpakamatay babaen iti yiinumna iti sabidong.

(Premiado a mannurat ken mangisursuro daydi WVA ket adu dagiti sarita, daniw ken salaysayna ti nangabak ken impablaak ti Bannawag ken dadduma pay a magasin iti Kailokuan. – Ed)

“ADDAN sa anabaab? Partakak ngarud ta amangan no maabutandak. O mangrisut iti amin a punial! adtoy ti kalubanmo; makapaginanaak iti ipupusayko…” (Maidasay iti barukong ni Romeo.)

Nayulog iti Iluko a maysa kadagiti maudi a linia wenno binatog iti “Romeo and Juliet”, a sinurat ni William Shakespeare, kalatakan ngata a dramaturgo iti lubong. Binagsol ni Juliet ti bagina iti punial ni ipatpategna unay a Romeo agsipud ta nadatnganna daytoy a nagpakamatay babaen iti yiinumna iti sabidong.

Kastoy ti nayababa a pakasaritaan ti naindaklan nga ayan-ayat da Romeo ken Juliet. Kakaisuna nga anak ti Pamilia Montague ni Romeo, ken ni Juliet met kadagiti ag-Capulet. Nasaem ti gura ken agkabusor a mortal dagiti ag-Montague ken ag-Capulet iti estado ti Verona. Nupay arig-aggubat dagiti pamiliada, nasangal latta ti ayan-ayat da Romeo ken Juliet. Nagkasarda a sililimed babaen ti panangannong ni Prayle Laurence, gayyem ken kaunay-unayda.

Maikamano laeng  nga aldaw kalpasanna, nagririnnana dagiti ag-Montague ken ag-Capulet iti kalsada. Grabe ti sugat ken saan a naisalakan ti mangngagas ni Mercurio, kasinged ken kasinnaranay dagiti ag-Montague. Dimteng ni Romeo ket kinarangetna ni Tybalt a nangpatay ken ni Mercurio. Dinuyok ni Romeo iti rapier wenno akikid ti tademna nga espada ni Tybalt ket nagudas daytoy. Kaanakan ni Lakay Capulet ken kasinsin ni Juliet ni Tybalt.

Makapungtot unay ti prinsipe agsipud iti panagraranget manen dagiti ag-Montague ken ag-Capulet iti kalsada. Adun nga unget ken pamagbagana kadagitoy. Mabutbutengen dagiti umili gapu iti riribuk nga itden dagiti dua nga aggubgubat a pamilia. Pinabirokna ni Romeo. Pannakaibelleng iti sabali a pagilian ti inyetnagna a dusa.

Rinanta ni Romeo ni Prayle Laurence. Dina kayat ti maibelleng iti ruar ti pagilianda. Impatigmaan ti naanus ken mannakaawat a prayle a mapan aglemmeng ni Romeo sadiay nasulinek a Mantua pagur-urayanna iti ilalamiis ti ulo ti prinsipe. Tulongannanto ni Romeo a dumawat iti pammakawan ti prinsipe. Ket kasdiay ngarud ti inaramid ni Romeo.

Bayat ti kaawan ni Romeo, pilpiliten dagiti agassawa a Capulet ti anakda a ni Juliet a makiasawa ken ni Konde Paris. Madi ni Juliet ta ni laeng Romeo ti ay-ayatenna. Naginmamayat tapno di madegdegan ti luksaw kenkuana ti amana. Naidar-daras ti naituding nga aldaw a panagkasarda iti konde.

Nagpaibagnos ni Juliet ken ni Prayle Laurence no ania ti nasayaat nga aramidenna. Impalgak ti prayle nga adda iduldulin daytoy a draught wenno mara-arak a pagpaturog iti napaut. Iti kinabileg ti birtudna, temporario kano nga agsardeng ti pitik ti puso agraman dagiti ur-urat. Bum-sag ken kasla naglibas ti dara iti rupa. Awan dumana iti maysa a talaga a bangkay ngem agungar met laeng ti imminum kalpasan iti sumagmamano nga oras.

Nagtulagda a kasta ngarud ti aramiden ni Juliet. Pinakaammuan ni Prayle Laurence ni Romeo idiay Mantua. Inlawlawagna a naimbag iti baro ti napanunotanda a pamuspusan ken sikap. Umayto a sililimed ni Romeo tapno tubtobenna ti panteon ni Juliet. Yaon ken iruarna ti pagarupenda a bangkay ni Juliet. Inton agungar ni Juliet, kadua ni Romeo ti balasang nga aglibas ken agturong idiay Mantua.

Kabigatan ti kasar da Juliet ken Konde Paris, nasangatan ti kaamaan nga ag-Capulet a maysa a bangkay ti kakaisuna a balasangda. Pirmi a leddaangda a nangipumpon ken ni Juliet.

Iti Mantua, nadamag ni Romeo ti kellaat a pannakatay ni ipatpategna unay a Juliet. Dina metten kayat ti agbiag pay. Pinilitna ti maysa nga apothecary wenno kemiko, a mangilako kenkuana iti nabileg a sabidong. Iti ipapatayna, masapul a maimassayag a kaabay ni Juliet. Di nagtaktak a nagsubli iti Verona.

Iti pagipumponan iti arubayan ti simbaan, tinubtob ni Romeo ti panteon ni Juliet. Apaman a nainumna ti naibote a sabidong, simrek iti panteon sa nagidda iti abay ti bangkay ni ingungotenna unay a Juliet. Natubtobnan idi husto a sumangpet ni Konde Paris.

Adda awit ni Konde Paris a sabsabong tapno iruknoyna iti panteon ni Juliet. Nadatnganna ti ar-aramiden ni Romeo. Nakapungtot. Dina ipalubos a singaen ti asinoman ti bangkay ni Juliet nga ay-ayatenna!

Nakipakpakaasi ni Romeo ken ni Konde Paris a di koma pakibiangan ken paglan daytoy iti ar-aramidenna. Ngem saan a pinatgan ti konde, isu a kapilitan a sinalakniban ni Romeo ti bagina. Iti panagrangetda, napatayna ni Konde Paris.

Imbanag ni Romeo ti immayanna iti Verona. Intangad ken pinaatianna ti awitna a bote ti sabidong. Apagbiit ti isasamay ti nabileg a sabidong ket naarinuknok ken nagsatan iti anges ni Romeo.

(Adda tuloyna)

Comments are closed.