Footer

Naraut, 9 plantasion ti marihuana, 330,000 kapuon, napag-ot, napuoran

SUGPON, Ilocos Sur – Sabali manen a plantasion iti nagbedngan ti Benguet ken daytoy nga ili ti rinaut ti nagtipon a bunggoy dagiti polis ket ginabot ken pinuoranda ti ginasut a ribu a maiparparit a mula a marihuana.

Agdagup iti 300,000 a fully grown a marihuana ken 30,000 a bunubon ti pinarut ken pinuoran ti raiding team ti Philippine Drug Enforcement Agency (PDEA), 104th Provincial Mobile Group ken dagiti kameng ti Philippine National Police ditoy.

Mapattapatta nga agpateg iti P61.2 milion dagiti naparut a kapuon a marihuana a naimula iti siam a nagsisina a plantasion nga aglawa iti agarup 2 ektaria iti Mt. Banao a nagbedngan ti Barangay Caoayan ditoy ken ti Bakun, Benguet.

Nangibaba dagiti rimmaut iti sumagmamano kareppet ti naparut a mula ti marihuana kalpasan a pinuoranda dagiti pinag-utda.

Daytoy ti maikadua a gundaway a rinaut dagiti pannakabagi ti linteg dagiti plantasion ti marihuana iti nagbeddengan ti Benguet ken daytoy nga ili iti daytoy a tawen kas naing-inget a kampaniada iti maiparparit a droga.

Itay Feb. 3, nagbuligan ti Philippine Army ken PNP a rinaut ti 12.5 ektaria a plantasion ti marihuana a mapattapatta nga agpateg iti P75 milion iti nagbeddengan ti Kibungan ken Bakun, Benguet ken daytoy nga ili a nagtungpal iti pannakapag-ot ken pannakapuor dagitoy maiparparit a mula.

Mismo a ni Police Chief Supt. Leopoldo Bataoil, regional director to PNP Region I, Col. Loreto Rirao, commanding officer ti 503rd Infantry Brigade, Col. Harold Cabreros, commanding officer ti 50th Infantry Brigade ti nangimatang iti ceremonial burning dagiti naibaba a naparut a mula a marihuana iti sanguanan ti munisipio daytoy nga ili.  

Kanaig daytoy, kinondenar dagiti residente ditoy ti kaadda dagiti plantasion ti marihuana iti nagbeddengan ti ilida ken ti Kibungan, Benguet a kunada a mangmangted iti dakes nga imahe iti ilida.

Kinuna dagiti lumugar nga iti laeng nagbeddengan ti ilida ken ti Bakun, Kibungan iti Benguet iti pakasarakan kadagiti plantasion ti marihuana ngem no rimmuar ti damag iti telebision, radio ken warnakan, ti Sugpon iti kangrunaan a madakdakamat, banag a pakadadaelan ti nagan ti lugarda.

Kinuna ni Sugpon Mayor Fernando Quiton a ti marihuana ti maysa kadagiti kayatda a mapaksiat iti ilida ta malaksid a mangdadael iti salun-at dagiti tattao, mairamraman pay a madadael ti nagan ti ilida.

Inyunay-unay ni Quiton a saan nga iti las-ud ti masakupan ti Sugpon ti pakaimulmulaan dagiti marihuana no di iti tri-boundary ti munisipio ti Kibungan, Bakun ken Sugpon.

Agingga ita, di pay narisut ti territorial dispute iti nagbaetan ti Sugpon ken ti nasao a munisipio ti Benguet.