Footer

Politika: monopolia dagiti babaknang

Ditoy pagilian, nagbalinen a nangina unay ti politika. No awan ti kuartam, kaarigmo ti agsibbol iti mansanas iti bulan. Wenno agbilang no mano ti kadagupan dagiti tanem kadagiti kamposanto.

Dakkel ti akem ti kuarta iti panagkandidato ti maysa a politiko iti pagtakeman a tarigagayanna. Agpayso, dakkel a makatulong ti popularidad ken kabaelan ti kandidato ngem no awan ti kuartana, aglalo no saan a nairaman iti bendision ti administrasion, dakkel unay a pakaarusanna iti panagkampaniana.

Kas panangannugot met laeng da Sen. Ralph Recto ken Diputado iti Surigao Prospero Pichay, Jr., agpada nga agtarigagay para senador iti babaen ti tiket ti administrasion, mapalubosan ti kandidato a mangpaltuad iti P120 milion a gastuenna iti eleksion.

Ngem segun ken ni Pichay, mabalin ti kandidato ti gumasto iti agingga iti P200 milion agsipud ta intuding ti Commission on Elections nga aggasto ti kandidato iti saan a nangatngato ngem P3 para tunggal rehistrado a botante.

Adda nakurang a 44 milion a botante iti pagilian ket no gastuen ti kandidato ti P3.00/botante, nakatingtinggaw a P130 milion ti ilatang ti kandidato para iti kampaniana.

Sabali laeng ti gastuen ti partido para iti sibubukel a tiket tapno masigurado ti panangabakda aglalo ket maibilang daytoy midterm election a reperendum ti agdama a turay ni Pres. Arroyo.

Iti maysa a bangir, ita pay a kasapa umareng-engen dagiti kandidato ti oposision iti kakirang ti pundoda para iti panagkampaniada iti sapasap a pagilian.

No patien ti maysa a kandidato para senador, nakirang ti pundo nga agsangpet manipud kadagiti contributors agsipud iti amakda a bueltaan ida ti administrasion a kunada a mangparigat iti biagda ken negosioda no maduktalan a tumulongda iti oposision.

Iti sabali a bangir, annugoten man wenno saan da Recto, daytoy ti kangrunaan a gapu no apay a timmiponda iti tiket ti administrasion. Nagbalinda a praktikal ta pagsayaatanda ti pannakairamanda iti tiket ti administrasion gapu iti iggem daytoy a makinaria a mangitag-ay iti kandidaturada.

Agareng-eng pay dagiti kandidato iti oposision a maibilang kadagiti nangatngato nga agpang ti panagbiag gapu iti posision, negosio ken nakaikamenganda a pamilia, anianto la ketdin dagiti ordinario nga umili?

Iti kastoy a situasion, awan ti pakailugaran ni napanglaw iti politika, uray igpilna ti nasged a tarigagayna nga agserbi.

Nakakaskasdaaw ngarud a monopolia dagiti babaknang ti politika iti pagilian?