Footer

Turban, Bumangon!

Mapapaay, maup-upay.

No madlaw, makapagbalaw:  “Apay,

Ania a saguday ti naikessay,

Ta di umanay ti tunggal tignay?”

Ni Ripfer
 

Mapapaay, maup-upay.
No madlaw, makapagbalaw:  “Apay,
Ania a saguday ti naikessay,
Ta di umanay ti tunggal tignay?”
Kurang!  Ket naldaang.  Nasanaang?

Napintas ken nabileg a tarigagay,
Di maibbatan, ta isut’ pagtaudan ti kaipapanan
A mangiwanwan ti pagnaan
Ti pagturongan, iti tunggal addang,
Iti nakaikarian a pagtungpalan –
A sapay koma kapkapnekan.

Ngem kurang! Arapaap a matungday?
Tarigagay a makeltay?
Balligi a saksakbayan,
Gungona a segseggaan –
Sadinot’ pakabirokan?

Makuna ti nabilbileg: “Ti balangat, ti gunggona!”
Maiyisem ti naatiw, naabak: “No la koma…!”
Kastoy ti salip, saan aya?
Innalibtak, awan pambar,
Ngem, agparukma, itulok ngata?

Ti laeng makaparmek ti pannakaupay
Ti maskedan ken matubay
A makaparsua ti masakbayan.
Inna pay ngata maipaay
Gunggundaway a pagkatawaan –

Rangkapen a pakaungaran dagiti matamtamnay,
Dagiti malmalday, masarsaranay, wenno ritrituren
         ti tarumpingay;
Ta no ti matirtiris ket paglinglingayan,
Saan a sennaay, no di ket ganaygay
Ti sumamay – uray payen piman iti mapaggaakan!

Tibker, kired, ken pigsa;
Itured ket patineb – ti bileg magubuay,
Ket namnamat’ mangipaay.
Ti seggaan a masakbayan.
Ti naglasatan ket pagsadagan ken pagtakderan.

Ti tarigagay di agsarday – apay a paupay?
Kupikopanto ti makaungar
Ti bunga ti ganaygay,
Ta bileg ken kired inda sumamay.
Ti talek ken namnama litupanda ti di naan-anay!

Comments are closed.