Footer

Vigan City division sports official, nababalaw gapu panagkissayna atleta para IRAA Meet

VIGAN CITY – Iti baet a nagsanay ken nakasaganadan a makisalip, nasurok a sangagasut nga atleta ti Division of City Schools ti Department of Education ditoy gapu iti mapapalti a panagkurkurang ti pundo.

Sumagmamano nga aldaw sakbay a mapan makisalip dagiti atleta ti Division of Vigan City Schools iti Ilocos Region Athletic Association Meet a maangay iti San Carlos City inton Feb. 26-Mar. 2, impakaammo dagiti sports official ti nasao a dibision nga agkissayda kadagiti atleta agsipud ta agkurkurang ti pundo ti delegasion.

Impakaammo ni Maribel Pichay, city division sports coordinator, a manipud iti kadagupan a 362 nga atleta a mapan makidinnayo iti IRAA Meet, agbalin laengen a 234 agsipud ta saan nga umdas ti pundo a busbosen ti delegasion iti nasao a pasalip.

Binabalaw dagiti nagannak dagiti atleta a naikkat iti listaan ti sports official ti dibision iti dina panangipakaammo a nasapsapa iti problema ti pundo ti delegasion a mapan iti IRAA Meet.

Sumagmamano pay a nagannak ti nangibatad a sisasaganada a mangibaklay iti gastuen tapno mairaman a makisalip dagiti annakda iti nasao a dinnayo iti sports.

Ngem inkalintegan ni Pichay iti naangay a miting a tinabunuan dagiti sports coordinators, coaches ken trainers dagiti nadumaduma nga school districts, ken nagannak, a saan a makaanay ti P400,0000 a pundo nga inted ti city government idinto a mapattapatta a makabusbos ti delegasion iti P674,000 para iti 362 nga atleta ken opisial a makipartisipar iti IRAA meet.

Nangilatang ti gobierno ti siudad ditoy iti P200,000 manipud iti Special Education Fund ken sabali pay a P200,000 manipud iti Sports Development Fund para kadagiti atleta ti dibision ditoy.

Kabayatanna, impakaammo ni Provincial Sports Supervisor Meneleo Palma a nakasaganan dagiti atleta ti Division of Ilocos Sur a mapan makisalip iti IRAA meet.

Kinuna ni Palma nga awan ti problema iti gastuen ti delegasion agsipud iti dakkel a suporta ken pannakikammayyet ti gobierno probinsial.

Innayonna a dakkel ti namnamana a ngumatngato pay ti ranking a magun-od ti dibision ti Ilocos Sur iti IRAA Meet agsipud ta naitudodan dagiti sports a pagpigsaan dagiti school districts iti probinsia ket dagiti atleta dagitoy ti naipamaysa a nasanay idi Agosto ken Setiembre a nakisalip iti provincial meet.

Naituding nga agrubbuat ti delegasion ti dua a dibision iti Peb. 24.

Comments are closed.