Footer

Balay, sinerrek armado a tattao, akimbalay pinatay, tinakawanda

MAGSINGAL, Ilocos Sur – Panagtakaw wenno gura ti motibo ti pannakapatay?

Dagitoy ti palpalutpoten dagiti inbestigador ditoy a posible nga anggulo iti pannakapapatay ni Basilio Robino, 44, baro, residente ti Barangay Manzante ditoy iti agarup 11:30 ti rabii ti Pebrero 25 babaen dagiti di pay nabigbig nga armado a tattao.

Segun iti inisial nga inbestigasion, matmaturog ni Rabino iti pagtaenganna idi rinapido dagiti suspetsa a nagpuesto iti ruar ti balay.

Kalpasanna, simrek dagiti suspetsa ket pinaltoganda manen ti biktima.

Nakarekobre dagiti nagresponde a polis iti 22 a kapsula a nagtaud iti armalite rifle iti nakapasamakan ti krimen.

Naluktan dagiti kabinet ken drawer iti uneg ti pagtaengan ti biktima ket mapapati a kinasakas dagiti suspetsa dagiti personal a gamit ken kuarta daytoy.

Di pay ammo ti kadagupan ti natakaw a kuarta agsipud ta awan ti kabbalay ti biktima.

Segun dagiti kaarruba ti biktima, nangegda dagiti nagsasaruno a putok ngem nagbutengda a rimmuar amangan no mairamramanda.

Comments are closed.