Footer

Dakes a panglakagan

ITA pay a kasapa iti kampania, mapaliiw nga adda dagiti naiwayat a dakes a pamuspusan ken paglakagan tapno mailuges ti kasupanget a partido, nangruna ti kandidatura dagiti sumagmamano a politiko a nainget a kritiko ti agdama nga administrasion.

Pagarigan ni napadisi a Presidente Joseph Estrada. Itay nabiit, narestriktaran iti resthousena iti Tanay agsipud iti mapapati a plano dagiti komunista a rebelde a manggandat iti biagna, gapuna a di mapalubosan uray dagiti kandidato ti oposision a mangbisita kenkuana.

Ngem kuestion ditoy ti tiempo ti pannakaipakat iti restriksion ken ni Estrada ta iti pay met panangrugin ti kampania iti masungad nga eleksion.

Di ngarud maikkat ti suspetsa a maysa daytoy nga addang a mangpakipet kadagiti gunay ni Estrada tapno dina maikampania ti Genuine Opposition.

Annugoten man wenno saan ti administrasion, napigsa pay laeng ti “Estrada factor” a mangitag-ay iti kandidatura ti politiko a bendisionan ken itag-ayna ti imana.

Itay nabiit, maysa a Jose Pepito “Peter” Cayetano ti limtuad ket impilana ti kandidaturana para senador. Sabali laeng ti mapapati a kuestion iti citizenshipna kas imbunannag ti Department of Justice.

Ngem mamati ni Cayetano a maysa dagitoy a pamuspusan ti Malakaniang tapno maulaw dagiti botante ken madadael dagiti butos a mapan kenkuana.

 Umasping met ti kasona ken ni Dip. Benigno “Noynoy” Aquino III ta sabali pay nga Aquino ti limtuad a nangipila iti kandidaturana para senador.

Madakamat ditoy nga indagadag ni nag-Presidente Cory Aquino ti panaglusulos ni Pres. Arroyo gapu iti kontrobersia a pinarnuay iti mapapati a panagsuitik iti eleksion idi 2004.

Iti sabali a bangir, naisalpika ni Sen. Panfilo Lacson a nakirang ti pundo a mapan iti oposision manipud kadagiti contributors, saan a gapu iti kaawan ti suporta ken regget dagitoy no di iti amak a bueltaan ida ti administrasion no maduktalan a tumultulongda iti oposision.

Nadadagsen dagitoy nga alegasion maikontra iti agdama nga administrasion. Mabalin nga adda kinapudnoda wenno estrahehia laeng ti oposision tapno makaawis iti simpatia manipud iti agbutos a publiko.

Ngem pudno man wenno saan, pagrebbengan ti administrasion a maikkan iti patas a gundaway amin dagiti kandidato, nangruna dagiti adda iti oposision iti daytoy a rupak iti politika iti nademokrasiaan a pagilian a kas iti Pilipinas. Pagrebbengan ti gobierno a nadalus, naurnos ken natalna daytoy nga eleksion tapno ti laeng pudpudno a karirikna ken tarigagay dagiti botante ti rumimbaw ken matungpal.

Masipsiputan ita daytoy nga eleksion. Kas kuna dagiti agtuturay ti Simbaan, agbalin daytoy nga eleksion a reperendum iti turay ni Pres. Arroyo. Agbalin met daytoy a litmus test no kabaelan ti Comelec ti mangisayangkat iti eleksion a saan a namansaan iti panagsuitik, kas iti alegasion a napasamak idi 2004, maysa nga isyo a saan a maikupkupin iti baet iti pannakaibasura dagiti nagsaruno nga impeachment complaint maikontra ken ni Pres. Arroyo.

Aniaman ti resulta ti eleksion, daytay makunatayo nga awan piltak ti panagsaur, pammutbuteng, ken riribuk tapno tumalingenngen metten ti kasasaad ti politika iti pagilian.

Comments are closed.