Footer

P1-B proyekto, mamagsisilpot kalsada gingginget a lugar ti I. Sur iti Benguet, Mt. Province

CANDON CITY – Kinuna ni Dip. Eric Singson a masirmatan ti nadur-as nga Ilokandia babaen ti pannakaiyimplementar ti P1-billion a proyekto a mamagsilpo iti gingginget a lugar iti probinsia iti Benguet ken Mountain Province.

Kinuna ti diputado a narigat ti kasasaad dagiti kailianna nga adda iti kabambantayan ngem babaen kadagitoy a proyekto ti inprastruktura, manamnama ti panagdur-as met dagiti ilida.

“Adda nailatang a P250 million para iti pannakaisilpotayo iti kalsada iti Benguet, iti Abatan kasta met iti Sabangan a mapan iti Mountain Province, kinuna ti House Deputy Speaker.

No malpas ti proyekto, as-asidegton ti pagnaan dagiti agindeg iti Lepanto Mines, partikular iti Cervantes road nga agturong iti Poro Point iti San Fernando City, La Union, segun iti diputado.

Naammuan ken ni Singson a malaksid iti P250 million a para iti Cervantes-Benguet road, adda pay P340 million para iti panakaituloy ti Suyo-Cervantes road. Nalpasen ti panakasemento ti kalsada manipud iti barangay Baringcucurong iti Suyo agingga iti Poblacion. Manarimaan ti pannakaituloy ti nasao a kalsada.

Kinuna ni Singson nga adda pay P15 million para iti San Emilio-Quirino road,  P10  million para iti San Emilio – Gregorio del Pilar, ken P20 milion para iti Salcedo-Santa Lucia road.

“Maminpinsan nga agprogreso dagiti adda iti deppaarna iti daya ta napintasen ti kalsada nga agturong iti Suyo, iti Cervantes, sa iti Quirino, a bumababa iti San Emilio a kumamang iti national highway,” innayon ni Singson.

Comments are closed.