Footer

Panagbenga: kandidato para senador, nakilaok parada

BAGUIO CITY – Kas ninamnama, ginundawayan dagiti kandidato a para senador ti Panagbenga Festival tapno makita ken makadakulapda dagiti rinibu a turista, sangsangaili ken residente a simmang-at ditoy para iti daytoy tinawen a parambak.

Nangigis ti isemda bayat ti di agsarday a panagpayapay dagiti kandidato ti Team Unity a pakairamanan da Sen. Ralph Recto, Sen. Edgardo Angara, Gov. Luis “Chavit” Singson, Cesar Montano, Diputado ti Bukidnon Miguel Zubiri, dati a Sen. Tessie Aquino Oreta, Sultan Jamalul Kiram III, ken Gov. Vicente Magsaysay.

Sabali a float ti nagluganan ni Diputado ti Surigao del Sur Prospero Pichay. Adda pay nagampayag iti ngatuen ti nakaangayan ti parada a helicopter a nalawag a pakabasaan iti sikigan daytoy ti nagan ti nasao a kandidato.

Nakipartisipar ni Michael Defensor iti parada a nakasakay iti kabalio. Bimmaba met ni Magsaysay iti naglugananna a float sa nagsakay iti kabalio a nakiragup iti parada.

Nagsuot da Sen. Recto ken ni Sen. Joker Arroyo iti kawes ti mannakigubat a Kalinga sada nagtokar iti gansa.

Saan met a nagpaudi ni Sen. Pres. Manuel Villar. Kaduana dagiti boluntario a para kampaniana a mangsarsaruno iti loudspeaker a nangipatpatangatang iti jinglena.

Nagpabus-oy pay ni Villar a nakiretrato, nakipatpatang ken nakidinnakulap kadagiti agbuybuya.

Saan pay a nalapdan dagiti kandidato a nagibato kadagiti campaign giveaways manipud iti naglugananda a floats iti baet a maiparit daytoy kas sagudayen ti paglintegan ti nasao a festival.

Kinuna ti maysa a sangaili a napan nagbuya a nadadael ti naurnos nga agus ti parada gapu iti yuuneg dagiti tattao iti pagdalanan a kalsada tapno laeng makadakulapda dagiti kandidato ken makatukmada kadagiti giveaways nga imbato dagitoy.

Kinuna met ti maysa a taga-Ilocos Sur a simmang-at tapno laeng makipagrambak iti Panagbenga a dakkel ti pannakaupayna agsipud ta dinadael dagiti politiko ti pasken idinto a nairanta daytoy a panangitampok ti siudad kadagiti produktona a sabsabong ken nabaknang a kulturana.

“Natibnokan metten ti pasken iti politika a nangdadael iti kangrunaan a panggep ti festival,” kinunana.

Mapattapatta a nasurok a 300,000 a tattao ti simmang-at ditoy para iti Panagbenga Festival a maibilang a maysa kadagiti kangrunaan a tourist attraction ti siudad.

Comments are closed.