Footer

Pawnshop iti Narvacan, natakawan

NARVACAN, Ilocos Sur – Maysa a pagsaldaan ditoy ti sinerrek dagiti armado a tattao iti alas dies ti aldaw ti Peb. 27 ket kinasakasda ti kuarta ken alahas a nakadulin iti vault.

Intaray dagiti di pay nabigbig a mannanakaw ti P20,000 a kuarta ken di pay masinunuo ti pategna nga alahas iti kaha ti Justin T. Cua Pawnshop, kukua ni Linda Cua ti Laoag City a masarakan iti Barangay San Jose, ditoy, .

Iti inisial nga inbestigasion ti polis, simrek iti pagsaldaan iti dayta a bigat ni Gwendolyn Tong, 38, naasawaan, empleado ken mangimatmaton iti nasao a pawnshop ken residente iti dayta met laeng a barangay,   ngem kas kadawyanna, rimmuar met laeng ket napanna kinita ti negosioda iti tabako nga adda laeng iti asideg ti pawnshop.

Mapapati nga adda nangsurot kenkuana idi agsubli ket idi sumrek koman iti pagsaldaan, tinukmaan dagiti suspetsa sada tinutokan iti kutsilio ti tengngedna.

Inulod dagiti mannanakaw ni Tong iti comfort room sada impupok ditoy.

Kinurimes dagiti mannanakaw ti kuarta nga agdagup iti P20,000 ken alahas a di pay ammo ti dagupna.

Naglibas dagiti suspetsa iti saan nga ammo a direksion.

Naammuan ti panagtakaw idi maduktalan ni Janet Soria, empleado met laeng iti pagsaldaan, ni Tong a nakapupok iti comfort room.

Naitaray ti biktima iti Sto. Niño Hospital sa naiyalis iti Reyes Clinic and Hospital para iti panakaagas ti sugatna.

Nagkedked ti biktima a makainnuman ti media  agsipud ta kinunana a nangato pay laeng ti presionna.

Agtultuloy ti imbestigasion ti pulisia iti nasao nga insidente.