Footer

Anti-terror law, bareng di maabuso

Pinirmaanen ni Pres. Gloria Macapagal-Arroyo ti Republic Act No. 9372 wenno Human Security Act of 2007 itay nabiit. Nupay kasta, santo laeng mayimplementar kalpasan eleksion ta adda amak a maaramat ti linteg a panglipit kadagiti kandidato ti oposision iti eleksion.

Adda ngarud marikna a reserbasion kadagiti kritiko ti gobierno iti daytoy a linteg a kuna ti turay nga armas a pakirupak iti terorismo.

Sagudayen daytoy a linteg nga agbalinen ti terorismo a krimen a pakadusaan dagiti aglabsing iti 40 tawen a pannakabalud.

Iti babaen daytoy a linteg, nailadawan ti terorismo a kas tignay a “mangimula ken mangted iti sapasap ken naidumduma a panagbuteng ken karibuso kadagiti agnaed, a mangpilit iti gobierno a mangted iti di nainkalintegan a demanda.”

Maysa a di pakaidnaan dagiti umili ti panangipalubos ti linteg iti pannakadetene dagiti suspetsa iti tallo nga aldaw nga awan ti pakaisaklanganda, pannaka-wiretap kadagiti komunikasion dagiti terror suspects, ken pannakasiput kadagiti depositoda ti bangko.

Saan a malibak: adda dagiti pasetna a saan a nalawag ket posible a pagtaudan iti pannakaabuso iti kalintegan dagiti tattao.

Kadagiti militante a grupo, maysa daytoy a pananglabsing iti kalintegan dagiti tattao iti pribasia, panagtignay, seguridad kas tao ken nakaikappengan iti politika.

Kangrunaan nga amak dagitoy a grupo ti panangaramat iti gobierno iti linteg tapno pasardengenna ken leplepan amin a porma iti lehitimo a krusada nga irusat dagiti tattao maibusor kadagiti kontra-tattao a polisia ti gobierno.

Saan a maikkat daytoy nga amak iti baet nga impatalged ni Pres. Arroyo nga awan ti pagbutngan dagiti agtungtungpal iti linteg a Pilipino iti daytoy a linteg agsipud ta “armas a maaramat maikontra kadagiti agisayangkat iti panagbomba a saan ketdi a dagiti agprotesta.”

Kas nakuna ni Sen. Franklin Drilon, “ti integridad, pannakabael ken panagtalek kadagiti mangipakpakat iti lintegtayo ken iti departamento ti hustisia ti mangibatad iti diperensia iti nagbaetan ti panagballigi wenno pannakapaay iti anti-terror law.”

Yan ti rigatna, adu nga umili ti saan nga agtalek kadagiti balikas ni Pres. Arroyo aglalo iti sanguanan dagiti inaramidna iti napalabas kas iti panangipaulogna iti sumagmamano a proklamasion ken executive orders a di inayonan ti Korte Suprema agsipud ta saanda a sonstitusional.

Makunami met: ikkantayo iti tsansa ti nasao a linteg nga adda karaipna a kararag a dinto abusuen ti gobierno, aglalo dagiti polis ken militar a mangleplep ken mamagulimek iti timek dagiti umili nangruna dagiti kritiko ti turay.

Comments are closed.