Footer

Candon City, 28 medalia inabakna iti IRAA

SAN CARLOS CITY – Kasungani ti delegasion ti DepEd Division of Ilocos Sur ken ti Vigan City Division, nakurang a tallopulo a medalia ti inyalat ti Candon City Division iti kalkalpas nga Inter-Regional Athletic Association (IRAA) a naangay iti San Carlos City itay nabiit.

Kinuna ni Alex Razo, agdama nga education supervisor ken sports coordinator ti Candon, malaksid iti 15 a balitok, nangabak ti Candon City iti 6 a silver ken 7 a bronse wenno iti kadagupan a 28 a medalia.

Kinunana a da Rhealyn Pascua, Junelle Gallebo Generose Razo ken Jessica Canero, agraman ti 11-man team ti football ti nangibayog iti Candon iti kalkalpas a paay-ayam ti IRAA a nakisalipan dagiti agbasbasa iti elementaria ken high school iti intero a rehion.

Kas ninamnama, balitok a medalia ti inyawid ni Rhealyn, standout iti Manila Youth Games a naisayangkat idiay Manila, iti triple jump; ni Junelle Gallebo iti 200 meter dash; ni Jessica Canero iti 800 meters, ni Generose a gapgapuna itay laeng napan a tawen idiay Indonesia, iti chess, idinto a nagkampeon ti football team kalpasan nga inlugesna dagiti amin a kinasangona.

Kinuna ni Razo a dakkel ti suporta nga impaay ti Candon City government babaen ti panangidaulo ni mayor Allen Singson, agraman dagiti coaches a nangtarabay kadagiti ubbing.

“No ad-adu nga atleta ti naipatulod, ad-adu nga events ti nakisalipanda ket ad-adu koma ti medalia nga insangpet ti delegasion,” kinuna ni Razo.

Iti sabali a bangir, nagsagrap iti pammabalaw dagiti sports officials ti Vigan City Division gapu iti panagkissayda kadagiti atleta, makalawas sakbay ti ipapanda pannakipartsipar iti IRAA iti baet a nakasaganan dagiti atleta a mapan makisalip.

Kangrunaan a rason ti sports coordinator ti dibision nga agkurkurang ti pundo a busbosen ti delegasion.

Manipud iti 362 nga atleta, nagbalin laengen a 234 ti bilang ti delegasion a napan nakisalip iti IRAA.

Ngem kinuna ni Mayor Ferdinand C. Medina a saan a husto nga agkurkurang ti pundo no di nagbiddut dagiti sports officials ta nagalada iti players nga immuna sada indatag ti budget sumagmamano nga aldaw sakbay nga agluas ti delegasion.

Agdagup iti P400,000 ti inted ti city government a gastuen ti delegasion iti pannakidinnayona iti sports iti IRAA.

Nagun-od ti Candon City ti maika-10 iti medal standing idinto nga adda ti Vigan City Division iti maika-13 a puesto. Agpada met a maika-8 ti ranggo ti elementaria ken sekundaria ti dibision ti Ilocos Sur.