Footer

Dagiti pakasaritaan ti naindaklan nga ayat (Maikatlo a paset)

NALUNAG ti asi dagiti agassawa iti panagpakpakaasi ken tokar ni Orpheus. Inayabanda ngarud ni Eurydice ta palubosandan. Ngem iti kondision a magna ni Orpheus iti una ken saan a tumaltaliaw iti likudan agingga iti makagteng iti ruar a lubong dagiti nabiag.

(Premiado a mannurat ken mangisursuro daydi WVA ket adu dagiti sarita, daniw ken salaysayna ti nangabak ken impablaak ti Bannawag ken dadduma pay a magasin iti Kailokuan. – Ed)

NALUNAG ti asi dagiti agassawa iti panagpakpakaasi ken tokar ni Orpheus. Inayabanda ngarud ni Eurydice ta palubosandan. Ngem iti kondision a magna ni Orpheus iti una ken saan a tumaltaliaw iti likudan agingga iti makagteng iti ruar a lubong dagiti nabiag.

Nagkuyog a nagna da Orpheus ken Eurydice iti nakaang-angep, nasipnget ken ingget-ulimek a dalan iti Hades wenno Impierno. Asidegdan iti rummuaran idi di mateppelan lattan ni Orpheus a kitaen ti asawana nga adda iti udi. Sinalungasingna ti imbaga ni nakaam-amak nga Ari Pluto a mangituray iti lubong dagiti natay.

Namitlo a nagdulluog lattan iti nakapigpigsa manipud kadagiti dan-aw ken karayan ti Impierno. Namatmatan ni Orpheus ti kasla pannakalunag sa kunam no asuk a panagpukaw ni Eurydice.

PASET met ti historia ti pagilian wenno ti sangalubongan dagiti pakasaritaan ti naindaklan nga ayan-ayat. Pudno a napasamak. Dagiti kameng ti asul wenno natan-ok a dara nga awanan sakit ti nakem nga immulog iti tronoda ta napatpateg a makikallaysa ken makadennada ti maysa a commoner wenno gagangay laeng nga umili nga ay-ayatenda. Dagiti makunkuna a millionaire-heiress a nangtallikud iti sagsagrapenda a kinanam-ay ken ti tawidenda koma a kinabaknang tapno aggianda iti sidong ti nakurapay ngem ipatpategda unay. Dagiti pay social elite wenno kameng ti alta sociedad a mangpanaw iti kinalatak tapno makadennada ti ay-ayatenda uray pay ngata iti kaeskuateran.

Ni Ari Solomon nupay maibagbaga a maysa laeng a biblical figure, dungdunguenna ti kaunaan nga asawana iti laksid ti kinaruay dagiti babbaketna. Ad-adda a paset ti diplomasiana kadagiti kaparangetda a nasion dagiti innem a gasut ken siam a pulo ket siam a sabali nga asawana. Saanda a mabalin a gubaten ta naikamang ngarud kadakuada a kas met la idi panawen ti amana a ni Ari David. Regalo kenkuana dagiti padana nga ari wenno mangituray ti kaaduan kadagiti tallo gasut a concubine wenno kamalalana.

Adda parparat no naindaklan wenno naindakkelan nga agayat idi ni Ari Solomon. Ania ket a suertenan!

Nalatak met ti pakasaritaan ti ayan-ayat idi da Mark Antony ken Cleopatra. Ni Mark Antony, pagtaltalkan ken pannakakannawan a takiag idi ni Julius Caesar, emperador ken pontifex maximus wenno dauluen dagiti padi iti Roma. Iti maaw-awagan iti “Ides of March”, Marso 15, 44 B.C., pinapatay dagiti senador a Romano nga indauluan da Brutus ken Cassius ni Julius Caesar. Pinarmek ni Mark Antony da Brutus ken Cassius iti gubat. Nagpakamatay dagiti dua. Nagudas ni Cicero, balitok ti panagdildilana ken kalaingan nga orador iti Roma, agsipud iti situtured a pananglaglagidawna ken ni Mark Antony. Adda limtaw a nabileg a lider kabayatan ti riribuk iti Roma, ni Octavian ngem nasabalian ti naganna idi agtanoy a kas Augustus, nga apoko-kaanakan ni Julius Caesar.

Maysa a trahedia wenno nakaledleddaang ti nagbanagan idi ti ayan-ayat da Mark Antony ken eksotika a reyna ti Ehipto Cleopatra. Kinettelda ti bukodda nga anges ta di maliklikan ti panagsinada agsipud iti panaggubat dagiti pagilianda. Ken napadisi ni Mark Antony a kas kabilegan iti emperio ti Roma.

Pimmusay idi ti ingungoten unay nga asawa ni Sha Jahan (1628-1658). Kabsatna ni Jahangir ken annak ida ni Akbar “The Great” nga idi panawen, daytoy ti karimatan a panagturay ti dinastia  dagiti Mughal a Persiano iti India. Agsipud iti naindaklan nga ayat ni Shah Jahan iti pimmusay nga asawana, impatakderanna daytoy iti nakadakdakkel ken nakapimpintas a mausoleo. Adu a tawen ken ginasut a trabahador sa nalpas. Maysa ita a pagsidsiddaawan iti lubong ken daydaywen dagiti turista. Daytoy ti Taj Mahal, a masarakan iti Agra, India.

(Adda tuloyna)