Footer

Di nainkalintegan, singasing a mangideklara broadcaster a persona non grata iti Caoayan: Media

VIGAN CITY – Kinondena dagiti grupo ti media a maysa a panaglabsing iti wayawaya ti prensa ti resolusion ti Konseho ti Caoayan a mangiparit iti maysa nga estasion ti radio a mang-cover iti session ken mangideklara iti maysa a broadcaster a persona non grata.

Iti imparuar a waragawag dagiti grupo ti media iti probinsia a pakairamanan ti Ilocos Sur PNP Press Corp, Ilocos Sur Capitol Press Corp, 503rd Brigade Defense Press Corp, ken ti Vigan City Press Corp, kinunada a saan a nainkalintegan ti resolusion ti konseho ti Caoayan a temporario a mapawilan ti DWRS radio a mapan ag-coverage iti regular a session ti nasao a konseho ken ti panangideklarana ken ni Jun Ramos, komentarista iti DWRS a kas persona non grata iti nadakamat nga ili.

Mapapati a naidatag ti nasao a resolusion iti konseho ti Caoayan kas reaksion daytoy kadagiti kritisismo a naipatangatang iti programa ni Ramos a Barangay Brigada-Commando mainaig iti mapapati a naidardaras a panangaprobar ti konseho iti panagiyaon kadagiti landok manipud iti limned a barko iti kabaybayan a sakup ti Caoayan.

“Kas kameng ti media iti probinsia, alaenmi daytoy a gundaway a mangiyebkas iti saan a nainkalintegan a tignay dagiti kameng ti Konseho iti Caoayan para kadakami nga agserserbi iti kastoy a klase iti propesion,” kinuna ti pablaak idinto nga innayonna a “maysa daytoy a pannakalabsing iti wayawayami a kas (maysa nga) agiwarwarnak kas sagudayen ti linteg.”

“… Karbengan ti maysa nga agiwarwarnak, uray pay dagiti ordinario nga umili nga ammuen dagiti mapaspasamak iti maysa a Konseho tapno maipakaammo kadagiti masa,” inyunay-unay ti pablaak.

Kinuna ti grupo a “saan koma nga agbalin nga arsagid dagiti opisial ti gobierno no adda man isyo a maiturong kadakuada” ket numan pay ti DWRS laeng ti nadakamat iti resolusion, ti nasao a tignay ket pakaseknan amin a kameng ti media, saan laeng nga iti Ilocos Sur ngem iti sibubukel a pagilian ken sangalubongan.”

Comments are closed.