Footer

ISPSC, tumulong mangpadur-as iti produksion mannalon

STA. MARIA, Ilocos Sur – Agtultuloy ti pannakaadal dagiti kurso mainaig iti agrikultura tapno matulongan ti lokalidad a mangpaadu iti produksionda iti kataltalonan.

Daytoy ti inyunay-unay ni Dr. Alejandro Directo, presidente ti Ilocos Sur Polytechnic State College, idinto nga innayonna nga iwaywayatda daytoy a programa tapno agbalin a competitive dagiti kurso a maiyad-adal kadagiti nadumaduma a campuses ti ISPSC.

“Adu ti in-inawenmi a kurso a kayatmi nga i-offer ngem kasapulanmi pay ti approval ti Board of Trustees, kas koma iti Agro-forestry, dagiti nadumaduma nga specialization iti agriculture kas koma iti environmental education,” kinuna ni Dr. Directo.

Rinambakan itay nabiit ti ISPC ti 9th Charter Day a naisayangkat iti main cam-pusna iti daytoy nga ili.

Ti tema ti selebrasion:  “Pursuing, Reinvigorating and Empowering for Excellence.

Naitampok bayat ti selebrasion ti streetdancing showdown, inagurasion ti Bio-N Mixing Plant, medical mission nga inesponsoran ti Lions Club of the City of Candon, pannakapadayaw dagiti student achievers, pammigbig kadagiti nakaruar iti Licensure Examination for Teachers (LET), ken Search for Miss ISPSC 2007.

Addaan ti ISPS iti innem a campuses a masarakan amin iti maikadua a distrito ti Ilocos Sur a pakairaman ti Tagudin, Cervantes, Santiago, Narvacan, Candon ken ti main CAMPUS iti Santa Maria.

Kinuna ni Directo nga awan pay ti panggep ti ISPC a manglukat iti sabali a sangayna iti umuna a distrito.

“Adda metten ti University of Northern Philippines iti umuna a distrito ken adda met in-inawenda a sustainable development idiay Sinait,” kinuna ni Dr. Directo.