Footer

Polis rinautda pagpartuatan bongbong

SINAIT, Ilocos Sur – Dua a pagtaengan a mapapati a pagar-aramidan iti bongbong ti sinukisok dagiti pannakabagi ti linteg iti maysa a barangay ditoy itay nabiit.

Sinukisok ti nagtipon a bunggoy ti 103rd Provincial Mobile Group, EODD ken PNP ditoy babaen ti panangidaulo da P/Supt. Panfilo Racho, P/Insp. Maximo Taclas, P/Insp. Wilson Magpali ken P/Insp. Alexander Aurelio ti pagtaengan da Francis Ramos, 54, naasawaan, ken ni Joel Galleta, agpada a residente iti Barangay Paratong, ditoy ket nakasamsamda kadagiti ramramit a maar-aramid iti panagpartuat iti dinamita.

Nakumpiska iti pagtaengan ni Ramos ti 54 pedaso a non-electric blasting caps, 23” a time fuse, 18 pakete ti potassium nitrate a naikarga iti container nga agdagsen iti 18 kilos ken 27 pakete a potassium nitrate a naikabil iti burnay nga agdagsen iti 27 kilos.

Nasamsam met iti balay ni Galleta ti 63 pedaso a non-electric blasting cap, 1 time fuse nga agatiddog iti 123”, 26 a time nga agatiddog iti 2”, 1 a time fuse nga addaan iti improvised blasting cap, 1 time fuse nga agatiddog iti 25”, 4 a plastic bag a nagkarga iti mapapati a potassium nitrate nga agdagsen iti 4 kilos, 1 time fuse nga agatiddog iti 7”.

Imet dagiti raiding team iti panagsukisokda ti search warrant a pinirmaan ni Judge Francisco Ante, Jr. iti korte ti Vigan City

Adu dagiti reklamo a dumandanon iti polis iti illegal a panagbongbong iti kabaybayan a sakup daytoy nga ili ken Cabugao.

Comments are closed.