Footer

Wagas ti panagpili iti atleta, saan nga epektibo – sports official

BANTAY, Ilocos Sur – Saan nga epektibo ti wagas ti panagpilian kadagiti atleta isu a bimmaba ti ranggo ti Ilocos Sur iti pasalip iti ay-ayam iti rehion.

Daytoy ti maysa kadagiti ebaluasion ni sports supervisor ti dibision ti probinsia Meneleo Palma kalpasan ti makadismaya a performance ti delegasion ti Ilocos Sur iti kalkalpas nga Ilocos Region Athletic Association (IRAA) Meet a naangay iti San Carlos itay nabiit.

“No malagipyo, dua laeng a teams ti naglaban, 1st district ken 2nd district. Saan a nagepekto daydiay objective(na), isu a mabalin a daydiay ti maysa a rason,” kinuna ni Palma iti pannakiuman kenkuana ni Jun Ramos iti programa daytoy a Barangay Commando-Brigada.

Innayon pay ni Palma a “mabalin a napimpintas, naing-inget ti panagsagana dagiti dadduma a dibision.”

Iti kalkalpas a dinnayo iti IRAA sadiay San Carlos City, inyawid ti Ilocos Sur iti umuna ken maikadua a puesto iti high jump (elem. boys) ti Ilocos Sur.

Ti manen Ilocos Norte ti nagkampeon iti nasao a paay-ayam iti sports a pakapilian dagiti makisalip iti Palarong Pambansa.

Iti agdama a maang-angay a pasalip iti Central Luzon, Northern Luzon, Cordillera Qualifying Games  babaen ti panangimaton ti Philippine Olympics Council, mapattapatta nga adda latta ti Ilocos Sur iti nababa nga standing agsipud ta dandani met laeng dagiti atleta a nakasalipda iti IRAA ti nakipartisipar iti dinnayo.

Iti daytoy a pasalip, agkurri ti medal count, saan a kas iti IRAA a point system.

Iti napalabas nga IRAA, nangabak ti Ilocos Sur iti umuna ken maikadua iti high jump (elem. boys) ti Ilocos Sur.

Nakikampeonato met iti football (secondary) ken iti baseball (elementary) ngem agpadada a naabak iti Ilocos Norte.

Kinuna ni Palma a kalpasan ti Philippine Olympic Festival, mangangay iti miting para iti ebaluasion kadagiti dua a dinnayo iti sports.

Comments are closed.