Footer

Baguio City, kampeon iti 2nd Phil. Olympic Festival

BANTAY, Ilocos Sur – Inyalat ti Baguio City ti kampeonato iti maikadua a Philippine Olympic Festival a naangay itay Mar. 5-12 ditoy nga ili.

Iti panagkampeonna, inyawid ti Siudad ti Saleng ti 80 a balitok, adayo a maikadua ti Pangasinan babaen ti 56 a balitok idinto a maikatlo ti La Union babaen ti 39 a balitok.

Intarayan ti Baguio City dagiti kinasalipna kalpasan ti panangrimbaw dagiti atletana dagiti kinasalipda iti judo, taekwondo, wrestling, arnis, muay thai, archery ken  dadduma nga events.

Adda iti maikasiam a puesto ti Ilocos Sur, host province iti daytoy a qualifying games nga inangay ti POC.

Karimatan kadagiti atleta ti Baguio City ni Ana Melissa de Leon a nangiyalat iti innem a balitok iti arnis iti pana-ngidaulona dagiti dadduma pay a kakaduana a pakaibilangan ni Christopher de Leon nga adina a nangabak iti tallo a balitok ken nangubonanda iti kadagupan a 20 iti 25 a nakataya a medalia a balitok.

Nagminas iti 13 a balitok dagiti taekwondo jins a pakaibilangan da Mark Aldrin Rico, Dennis Pizarro, Daniel Kevin, Ivan Niño Tindoc, Benjamin Keith Sembrano, Fernand Delizo, Francis Bambico ken dagiti kaduada a babbai a pakairamanan da Jessica Arellano, Patricia Delizo ken Iyra Tindoc.

Inyalat met dagiti judokas a pakaibilangan da Karl Banganan, Julio Elias de Lenio, Saldon Caoile, Brenth Bilalat, Jerome Cayatog, Francis Dave Rillera ken Clarence Onanat ti 13 iti 15 a nakataya a balitok;  saggatlo a balitok ti inabak da Kristian Lango Sakiwat ken Renaldo Estabilo iti arnis; idinto a saggaysa a balitok ti inabak da Jay Olod, Johnny Bitaga, Jason Sanwangin, Alvin Velasco ken Clint Annawe iti muay thai.

Ti kadagupan a medal standings (gold, silver and bronze):

Baguio – 80, 68, 71; Pangasinan – 56, 36, 45; La Union – 39, 42, 39; Bulacan – 37, 25, 15; Nueva Ecija – 32, 22, 25; Zambales – 24, 34, 24 Ilocos Norte – 20, 18, 25 Angeles – 16, 13, 17; Ilocos Sur – 12, 17, 32; Benguet – 10, 13, 26; Cagayan – 9, 17, 21; Ifugao – 8, 6, 3; Isabela – 0, 2, 4;  Abra – 0, 1, 1;  Nueva Viscaya – 0, 0, 1;  Tarlac – 0, 0, 1; Olongapo City – 0, 0, 1.#

Comments are closed.