VIGAN CITY – Agtultuloy ti kandidatura ni Gov. Luis “Chavit” Singson para senador.

Daytoy ti impasingked ti gobernador iti sanguanan dagiti damag nga agsanuden nga agkandidato para senador ket agtaray laengen a para gobernador.

Nagdinamag pay a naglusdoy ni Singson iti maysa campaign sortie a dinar-ayanna.

Idi napan a bulan, naopera ni Singson gapu iti aneurysm iti tianna. Rimmuar met laeng iti ospital ni Singson kalpasan ti sumagmamano nga aldaw.

Imbatad ni Singson nga awan ti kinapudnona dagiti agwarwaras a damag idinto nga innayonna a parte dagitoy iti panangdadaelda kenkuana.

“Agtultuloy latta ti panangdadaelda ta mabutengda a makaruartayo,” kinuna ni Singson sana dinakamat nga iti resulta dagiti surbey, nangrugi iti maika-40 ngem iti naudi, addan iti maika-25 a puesto.

Kinuna ni Singson a ngumato pay ti ratingna no mangrugi ti panagkampania dagiti opisial nga agkandidato iti lokal a posision.

“Sigurado a ngumato ti ratingko no agandar ti amin nga opisiales, governors, congressmen, mayors ken barangay captains… a sumrekkami amin iti magic 12, isu a mabutengda unay ket amin a pangdadael, ibatbatoda kaniak,” kinuna ni Singson.

Sakbay ti kampania, inyendorso ti liga dagiti gobernador, ULAP, ken grupo dagiti Muslim ni Singson a bitibitenda a para senador.

Kinuna ni Singson a “nganngani amin a probinsia ket awan ti kandidato ti oposision, isu a no agandar ti amin nga administrasion dagiti governors, vice governors, bokal, congressmen, town ken city mayors, konsehal ken barangay captains, sigurado a ngumato ti rating amin a kandidato ti Team Unity.

“Awan kinapudnona dagiti atakeda kontra iti numo ti biang… aramid laeng dagiti awan ti maaramidna,” kinuna ti gobernador.

Kabayatanna, impakaammo ni Singson a mapan agkampania dagiti kandidato ti Team Unity iti probinsia ti Ilocos Sur iti Marso 16.

Maangay iti Quirino Stadium ti campaign sortie a manamnama a dar-ayan amin dagiti local officials ken maysa a konsierto a nakaawisan dagiti nalatak nga artista a mang-linglingay kadagiti tattao.#