Footer

Luna: berso ni ayat

tarigagayan ‘toy riknak nga asibayenka
asibayenka a mangriing iti matmaturog nga Ina

tarigagayan ‘toy riknak nga asibayenka
asibayenka a mangriing iti matmaturog nga Ina
Ina a babaen iti bara ti agekna, mataripato
mataripato tapno ita ken ti masakbayan, kalinnailo!

gandatko a tunggal kanito a mariparka
mariparka tapno sumalibukag met ‘toy rikna
rikna a kumidser a makaimatang kadagita isemmo,
isemmo a mangpurar kaniak, mangalino

.

naminsan nga inkidemmo, apagdarikmat a simmiripak
simmiripak ngem dagus a kinidmatannak
kinidmatannak a sidudungngo, naay-ayoak a nakisinnutil
nakisinnutil apagkanito, ket indulinko imbatim a gantil.

daytoy pusok kanayon a lumdaang
lumdaang a makaimatang nalailo a panagpakadam
panagpakadam a napakuyogan iti kari ni ayat
ayat a saanko a matagikua no di ket para ken ni Ina.

sika ti kiredko a mangagek iti sumangbay a sipnget
sipnget a ginubuay ti nangayed nga isisinam
isisinam a numanpay sangsangitak, isemak met ni gasat
gasat a naikari a mangted iti mangliwliwa a raniag.

sumkad man ‘toy nakemko iti inka ileleggak
ileleggak tapno siak met agrangpaya, mangted sellag
sellag a gapuanan ti ipabulodmo a silaw
silaw a mangtaripato, inay-ayatmo nga Ina.