Footer

Medina, maikkan autoridad a mangusar calamity fund para seawall iti Mindoro

VIGAN CITY – Kinuna ni Vice Mayor Franz Ranches a maikkan ni Mayor Ferdinand C. Medina iti pammalubos a mausar ti calamity fund ti 2007 para iti rekonstruktion ti seawall ti Barangay Mindoro.

Inaprobaran ti Sangguniang Panlungsod itay nabiit iti maikadua ken pinal a panagbasa ti resolusion a mangited iti autoridad ken ni Medina a mangusar iti calamity fund para iti pannakasimpa ti nadadael a seawall iti nasao a barangay.

Gapu iti peggad nga ibalballaag ti asideg unayen a baybay iti barangay Mindoro gapu iti pannnakatuang  ti salaknibna a seawall maigapu iti napalabas a bagyo a nangsanut iti probinsia,  kiniddaw ti executive branch iti sangguniang panlungsod a maikkan ti pammalubos ti mayor a mangaramat iti calamity fund tapno manayonan ti adda a pundo para iti pannakasimpa ti nasao a seawall.

Adda nailatang a pundo para iti seawall iti Mindoro a P2 milion ngem iti panagkita dagiti eksperto ken iti pammattapatta ti engineering department, agkurang isu nga adda kiddaw ti executive branch a mangusar iti calamity fund tapno mainayon iti existing fund para iti pannakasimpa ti nasao a seawall.

“Ammotayo ti itsurana tatta manipud idi na-erode,” kinuna ti bise mayor, idinto nga innayonna a “dumakkel a dumakkel ti danum isut gapuna a masimpa (seawall) tapno maikkan iti naan-anay a proteksion ti Barangay Mindoro aglalo dagiti coastal areas.”

Kinuna ni Ranches a “no adda man madakamat iti pundo ti 2007, ta adda pay dagiti dadduma a paggastuan a calamity related, awan ti makitatayo a problema no la ketdi adda daytoy authority a maited ti madaydayaw a mayor tapno mausar ti calamity fund para dayta seawall.”

Iti master plan ti siudad, insingasing dagiti urban planners ken environmentalist consultants ti pannakaipasdek iti estuaria kas solusion ti pannakarisud iti igid ti baybay iti Mindoro ngem dakkel ti magastos.#