Footer

Negosiante, agkasinsin, nagrambol

NARVACAN, Ilocos Sur.  Kusilap ti nagbalin a mitsa iti panagkakabil a napasamak iti maysa a barangay ditoy itay nabiit a nakainaigan ti maysa a negosiante ken  agkasinsin.

Naipresinto da Paul Bolos, 29, stall owner, ken natibo ti Tondo, Metro Manila ken dagiti agkasinsin a da Rolando Cabellon, Jr. 39, tricycle driver ken Rolando Samarro, 47, agpada a residente iti Barangay Parparia ditoy gapu iti panagkakabilda iti tiendaan publiko ti Barangay San Antonio ditoy nga ili.

Segun iti inisial nga inbestigasion, agtaktakder ni Bolos iti sanguanan ti tiendana idi nadungpar ni Cabellon a mapapati a nakainom.

Maipagarup a saan a nagustuan ni Cabellon ti panangkita kenkuana ni Bolos ket idi agsubli, kakuyognan ti kasinsinna ket dita a kinumprontana ni Bolos a nagtungpal iti panagdidinnanogda.

Naipan dagiti tallo iti ospital tapno maagasan ti dunorda sa iti kuerpo ti polis ditoy tapno maurnos ti saanda a panagkikinnaawatan. 

Comments are closed.