Footer

Operation Baklas, inwayat ti Comelec Candon, polis

CANDON CITY – Kas panangipatungpal iti pammilin ti Commission of Elections Manila, inwayat ti poll body ditoy ken ti Philippine National Police ti Operation Baklas kadagiti posters dagiti kandidato para senador.

Indauluan a mismo ni Atty. John Paul Martin, Election Officer III ti Candon, ti panangikkatda kadagiti posters a nakasab-it kadagiti kaykayo, poste, pader ken dadduma pay a di maiparbeng a pagipigketan iti posters.

Kinuna ni Martin nga adda dagiti nairanta a common poster area iti siudad a mabalin a  a pagipaskilan dagiti kandidato iti postersda ket dida agpangadua a mangikkat  kadagiti posters a naikabil kadagiti lugar a saan nga intuding ti Comelec a pagikabilan.

Kinuna ni Martin a 38 dagiti common poster areas iti siudad a pakaibilangan ti Rizal Park iti asideg ti Cyber Library, iti San Juan, Candon City, Northside ti Plaza Wayawaya, sango ti South Central Elementary School iti San Isidro, wet market ti Candon, sango ti Candon Beach resort ken dagiti barangay hall kadagiti barbarangay.

“Dagitoy laeng ti mabalin dagiti kandidate a pagipigketan iti posters ket insigida a maikkat dagiti posters a maikabil kadagiti saan a designated areas,” kinuna ni Atty. Martin.

Kinunana a   na-deputized dagiti barangay officials nga agikkat kadagiti posters a naikabil kadagiti di maiparbeng a lugar.

Indagadag ni Martin kadagiti botante ti panagsiputda ket saanda nga ibutos dagiti kandidato a dida ammo ti sumurot kadagiti paglintegan ti Comelec kas iti pangipigket iti posters iti common poster area.

“No dida masurot daytoy a pammilin,  di nakarkaro a saanda a suroten dagiti paglintegantayo?” kinuna ni Martin.

Comments are closed.