Footer

Puesto iti politika, pagsisinnublatan ti pamilia

Ditoy pagilian, ibilang dagiti politikoa tagikuada dagiti puesto iti gobierno a pagsisinnublatan ti pamiliada, ken pagaapaanda pay no saanda nga agkakasurotan.

Uray suyodem dagiti nadumaduma a pagilian iti lubong, ditoy laeng ti pakasarakam iti politika nga iggem laeng dagiti sumagmamano a pamilia a kasla ketdin tawidda daytoy a nainagan kadakuada ket ngarud, agpaay ken nairanta laeng a para kadakuada a sangapamilia.Pagarigan iti napalabas a Senado, dua ti senador nga Estrada: ni Sen. Luisa “Loi” Ejercito Estrada ken ni Jinggoy Estrada, asawa ken anak ni napadisi a Presidente Joseph Estrada.

Agkandidato koma pay a para senador ni Mayor ti San Juan JV Estrada, sabali pay nga anak ni Erap ngem dida kayat a maited ti kinamayor ti San Juan iti sabali a tao, isu nga agtaray met laeng ni JV a mayor. Mataginayon ngarud a baluarte dagiti Estrada ti San Juan.

Ita, kandidato a para senador ni Diputado Alan Peter Cayetano, kabsat ni Sen. Pia Cayetano, annak daydi nag-Senador Rene Cayetano. Adda iti magic 12, segun iti surbey, ni ub-ubing a Cayetano ket di masasaan nga agtiponda nga agkabsat iti Senado.

Kandidato met a para senador ni “Coco” Pimentel, anak ni Sen. Aquilino Pimentel, Jr. ket no mapagasatan, agkaabayda nga agama iti session iti Senado.

Agpada nga agkandidato para senador dagiti agikit a nag-Senador Tessie Aquino-Oreta ken Dip. Benigno “Noynoy” Aquino III. Posible nga agkaabayda iti tugaw iti Senado.

Kadagiti probinsia, kadawyanen a no maungpot ti ulo a politiko ti maikatlo a termino ti puestona, agpababa iti puesto ket ti asawana, wenno anakna ti mangsublat santo agsubli met laeng kalpasan ti tallo a tawen.
Saan metten a karkarna a kadagiti puesto iti sangguniang panlalawigan, sangguniang panlungsod, sangguniang bayan, nakatugaw dagiti agkabsat, agikit, aguliteg, agkasinsin ken asideg a kabagian ti ulo a politiko.

Sangkakalintegan dagitoy a politiko nga awan pay ti linteg a mangiparit iti dinastia ti politika, ngarud karbenganda, kas kadagiti kailianda, ti agtaray iti puesto agsipud iti “tarigagayda nga agserbi kadagiti tattao.”

Agpayso nga awan pay ti linteg a maikontra iti political dynasty agsipud ta agkatkatapokan dagiti gakat a naidatag maipapan itoy iti bodega ti pagpandayan linteg. Ngem kasano koma a lumsot iti Kongreso no di met italtalek dagiti politiko agsipud ta maseknan ti pagimbagan ken masakbayanda iti politika?
Saan a mailibak, nagtungpal a kastoy ti situasion ti politika iti pagilian agsipud iti kapanunotan, ken panirigan dagiti politiko a pagbibinglayan laeng ti pamiliada dagiti puesto.

Iti kastoy a klase ti politika, nakipet, kas iti abut ti dagum, a makastrek dagiti marigrigat ngem makabael ken nasged ti tarigagayda nga agserbi kadagiti kailianda.

Iti kastoy a klase ti politika, ania ti namnamaen dagiti umili a sumayaatan ti klase ti panagbiagda ken dumur-asan ti masakbayanda?