Footer

Scholarship program, maipapaay a benepisio iti tribu iti Ilokos

Nagasat dagiti kameng iti tribu ditoy Ilokos agsipud ta adda maipapaay kadakuada nga scholarship program tapno makaturposda iti kolehio ket maikkanda iti naraniag a masakbayan.

Daytoy ti inyunay-unay ni Rosalina Bistoyong, executive director ti National Commission on Indigenous People (NCIP) bayat ti simple a programa a naangay iti pagtaengan ni Dip. Eric Singson a nakaiyawatan dagiti tseke kadagiti 500 nga iskolar ti NCIP a busbosenda iti panagadalda.

Impanamnama pay ni Dip. Singson a manipud iti sigud a 1,000 nga scholars, nayonanna iti 200 tapno ad-adu pay nga ubbing ti mabenepisiaran iti nasao a programa.

Nairanta daytoy a programa ti NCIP-EAP a maited kadagiti kameng ti tribu iti Ilocos Sur nga aggapu ti pundo manipud iti Countrywide Development Fund ni Dip. Sisngson.

Maipapaay daytoy a programa kadagiti agbasbasa a kameng ti tribu ti Bago, Kankanaey wenno Tingguian, segun ken ni Bistoyong.

Kinuna ni Bistoyong nga iti kadagupan a 12 a million nga indigenous people iti pagilian, nagasgasat dagiti kameng iti tribu ti Kankanaey, Bago ken Itneg ken Tingguian iti Ilokos agsipud ta adda  scholarship program a nairanta para kadakuada tapno maka-pagtuloyda nga agbasa iti kolehio.

Dinakamatna a dagiti kameng ti tribu iti sabali a rehion, saan a para iti panagkolehioda ti mait-ited kadakuada nga educational assistance no di para iti panagbasada laeng iti elementaria ken sekundaria.

Dinakamat pay ni Bistoyong nga idi nagiwaras iti tulong para iti edukasion kadagiti napanglaw ngem makabael a kameng ti indigenous communities iti Region 5, awan sangagasut a kinasangona ken agbasbasada pay iti nababa a tukad ti pagadalan, saan a kas iti Ilocos Sur a ginasut dagiti agad-adal iti kolehio.

Iti sibubukel a Region 5, partikular iti tribu ti Agta-Simarut ken Agta-Tabangnon, P300,000 laeng ti educational assistance para kadagiti school children ket para laeng daytoy iti panagbasada iti elementaria ken sekundaria, segun ken ni Bistoyong.

Inlawlawagna pay nga iti maysa a research ti UNICEF, natakuatan a kababaan iti literacy level dagiti kameng ti tribu ti Kabihog iti Camarines Sur gapuna a prioridad a matulonganda para iti panagturposda iti elementaria ken sekundaria.

Kinunana a kadagiti nadumaduma a tribu iti Ilocos Sur, adun ti nagbalin nga  abogado, doktor, accountant ken nagturpos iti dadduma pay a kurso.#

Comments are closed.