Footer

4 polis absuelto iti kaso

SAN ESTEBAN, Ilocos Sur – Absuelto dagiti uppat a pannakabagi ti linteg a pakaibilangan ti sigud a hepe ti polis iti kaso nga impila dagiti mangngalap a tiniliwda gapu iti  illegal a panagkalap iti kabaybayan ditoy.

Daytoy ti naammuan ken ni PSI Antonio Reyes, agdama a deputy chief of police ti Narvacan, ken sigud a COP iti San Esteban PNP.

“Wen, addan resulta ti kaso nga impila dagiti mangngalap maikontra kadakami ket napaneknekan a service connected, isu a nairekomenda a mawaswas ken maserraanen.   Kayatna a sawen, nangabakkami iti kasomi,” kinuna ni Reyes bayat ti interbio kenkuana.

Kinunana nga itay napalabas a lawas a rimmuar ti desision manipud iti Camp Crame .

“Naggapu ti desision iti Directorate for Investigation and Detective Management idiay Camp Crame,” kinuna ni Reyes, idinto nga innayonna a dita a napaneknekan nga umno laeng ti panangtiliwda kadagiti nasao a mangngalap, isu a drop and closed ti nagbalin a rekomendasion iti nasao a kaso.

Nakasuan da Reyes ken tallo pay a polis a pakairamanan da  SPO2 Ricardo Ayunon, PO3 Celso Pang-ag ken ni PO1 Arnod Calzado gapu iti panangtiliwda kadagiti mangngalap a taga-Lingsat, Sta. Maria a naduktalan nga agkalkalap babaen ti compressor, maysa nga illegal a wagas ti panagkalap, iti kabaybayan a sakup ditoy.

Naiyalis ni Ayunon iti Burgos PNP, ni Pang-ag iti San Emilio ken ni Reyes iti Narvacan.

Kabayatanna, mapapati a mangipila manen dagiti  complainant iti sabali a kaso iti region one, grave threat kontra kadakuada.

Ngem kinuna ni Reyes a kumpiansada nga awan ti pagbanagan ti inpila dagitoy a kaso agsipud ta  trabaho met ti inobrada, ken mapapati a naglabsing dagiti complainant iti forum shopping.

Comments are closed.