Footer

6% growth rate ti ekonomia ti pagilian, nababa: Legarda

VIGAN CITY – Kinuna ni Genuine Opposition senatorial candidate Loren Legarda a nababa ti 6% growth rate ti ekonomia ti pagilian ket saan a marikna dagiti umili.

Indagadag ketdi ni Legarda ti pannakaited iti suporta kadagiti sektor a pannakaduri ti ekonomia kas iti agrikultura tapno nadardaras ti panagdur-as ti pagilian.

Iti presscon a naangay iti Vigan Culture and Trade Center itay Marso 22 a tinabunuan dagiti opisial ti siudad ti Vigan nga indauluan ni Mayor Ferdinand C. Medina, Vice Mayor Franz Ranches, Konsehal Everin Molina ken Konsehal Alfredo “Jun” Figuerres, dagiti supportersna ken kameng ti media, kinuna ni Legarda a saan a marikna dagiti ordinario a tattao ti panagdur-as ti ekonomia kas ibagbaga ti administrasion agsipud ta nababa ti 6% growth rate idinto nga innayonna a kasapulan a 7% daytoy tapno makuna a dimmur-as ti ekonomia.

“Kasapulan a sustainable ti growth rate iti las-ud ti sangapulo a tawen tapno marikna dagiti tattao ti epekto ti panagdur-as ti ekonomia,” kinuna ni Legarda.

Indarirag ni Legarda a maikkan iti suporta dagiti negosio iti “uneg” ken dagiti sektor a maibilang a duri ti ekonomia, kas iti ekonomia.

Sakbayna, iti panagkampaniana iti Ilocos Norte, indagadag pay ni Legarda iti nasional a gobierno ti pannakapugipog iti esmagling dagiti produkto ti agrikultura manipud kadagiti ganggannaet a pagilian a makibalubal kadagiti lokal a produkto ditoy kas iti bawang, lasona, kamatis, balatong ken kapas.

Kaadduan nga aggapu dagiti maipuslit a produkto manipud iti China, Taiwan ken dadduma pay a kaarruba a pagilian.

“Daytoy a pannakapaay ti nasional a gobierno a mangpasardeng iti panagipuslit kadagitoy a produkto agrikultura, dadaelenna ti panagbiag dagiti rinibu a nagaget a mannalon nga Ilokano,” kinuna ti dati a senadora.

Kinuna pay ni Legarda nga itandudona ti industria ti abel-Iloko ken iti kultura dagiti Ilokano no agtugaw iti Senado.