Footer

Balasang, nalipit iti dadapilan, natay

STA. MARIA, Ilocos Sur – Maysa a balasang ti nalipit bayat ti itutulongna nga agdapil iti barangay Tinaan ditoy nga ili a puon ti nakatayanna.

Segun iti report, tumultulong ni Mary Grace Atendido, 17, agnaed iti nasao met laeng a barangay, nga agisubsubo iti unas idi aksidente a nairaman a naisubo ti atiddog a manggas ti badona iti motorized sugar cane crusher a nakaputdan ti kanawan nga imana.

Saanen a naidanon a sibibiag ni Atendido iti ospital a nakaitarayanna.

Kinuna ti ina ti biktima, ni Maria Atendido, a napan timmulong ti anakna iti dadapilan tapno isu pay a masapulanna gapu iti kinarigat ti panagbiagda.

Kinunana a saanen a nagawid ti anakna ta nangan daytoy iti pagdapilan.

“Napanko pay kinita iti aldaw, pinukkawak pay  ket diak impagarup a daydiay ti maudin a pannakakitak kenkuana a sibibiag,” kinuna ni Maria.

Kinunana nga agarup alas dos iti malem idi ipakaammoda kenkuana a nadisgrasia  ni Mary Grace.

Awan kano ti nakakita no kasano a nadisgrasia ti biktima, ngem adda nagkuna a mapapati a natuang ti balasang iti grill ti dadapilan ket ditan a nalipit ti imana ket nairaman a nadingpil ti bagi ken ti rupana.

Kinunada nga uray awanen ti ima ti biktima, nabaelanna  pay laeng ti immadayo iti dadapilan tapno agpaarayat ngem napukawna ti puotna gapu iti kaadu ti nagsayasay a darana.

Naitaray ti biktima iti ospital ngem naideklara nga awanen ti biagna idi maidanon iti balay-pagagasan.

Kinuna ti ina ni Mary Grace nga awan ti pabasolenna iti napasamak ngem dinawatna ti itutulong dagiti kalugaranna para iti pannakaidulin ti anakna gapu iti kinarigat ti panagbiagda.

Comments are closed.