Footer

Dagiti main-inaw a dakes a panggep

ITAY NABIIT, tallo a lalaki a nagpammarang a casual nga empleado ti Commission on Elections ti nasukalan nga agkopkopia iti serial numbers dagiti maim-imprenta nga opisial a balota a maaramat iti masungad nga eleksion ken dagiti lugar a pakaaramatan dagitoy.

Adu ti ngimmato iti kidayna idi kunaen ketdin ni Comelec Chairman Benjamin Abalos  dina masirip no kasano a ti panagkopia kadagiti serial numbers dagiti balota ket agtungpal iti panagsuitik iti umadani nga eleksion idinto nga innayonna a posible a maysa laeng daytoy a panangsuot no kasano kaestrikto ti ahensia nga idauluanna iti pannakamonitor iti operasion ti National Printing Office.

Iti baet ti panangibilin ni Abalos iti pannakaisayangkat ti inbestigasion mainaig iti nasao nga insidente, di pay ammo agingga ita no asino dagiti tallo a lallaki, no ania ti motiboda iti panagkopiada, no asino ti nangbilin kadakuada nga aramidenda dayta, ken no ania ti addang nga inwayat ti Comelec tapno malapdan ti pannakaulit a mapasamak  ti kastoy.

Ngem uray ordinario nga umili, makitana ti implikasion ti nasao nga insidente no saan a nasigudan (?) a nasukalan.

No iggem ti maysa a grupo dagiti nakopia a numero ken ti lugar a pakaaramatanda, ken adda madadaan nga orihinal a papel a para iti balota, resulta iti eleksion ken certificates of canvass (COCs), awanen ti makalapped iti pannakaimprenta iti eksakto a duplikado dagiti porma ti eleksion a maaramat iti panagsuitik iti eleksion.

Idi eleksion idi 2004, adda alegasion a nasurok a maysa a million a balota ti sobra a naimprinta ket posible a naaramat dagitoy iti panagsuitik iti eleksion kas limtuad iti Hello Garci tapes.

Agingga ita, iti baet ti panangibagbaga ti administrasion nga awan ti napasamak a panagsuitik iti eleksion, adu nga umili, nangruna iti oposision, ti mamati a saan a ni Pres. Arroyo ti lehitimo a nangabak iti daytoy nga eleksion.

Masipsiputan ngarud no maiwayat ti nadalus, natalna, ken naurnos a panagbubutos inton Mayo daytoy a tawen.

Kas imbatad ti Simbaan Katoliko, agbalin a barometro daytoy nga eleksion no kabaelanen ti pagilian ti umaddang manipud iti krisis a dandani nangarpuog iti pundasion ti gobierno.

Maiyunay-unay ngarud nga ibulgar ti Comelec no asino ti akin-utek iti panagkopia kadagiti serial numbers dagiti maim-imprinta a balota.

Saan a rumbeng nga iyaleng-aleng ti Comelec daytoy ta agdadata a ti naaramid ket maysa  a panagpanggep a mangiwayat iti panagsuitik iti masungad nga eleksion.

Rumbeng laeng nga ipakita itan ti Comelec nga adda durina a mangtiped kadagiti agpanggep nga agsuitik iti eleksion.

Agsiputtayo, kakailian!

Comments are closed.