Footer

Panagbara ti lubong, makagapu fish kill kadagiti puttot, karayan iti Candon City

CANDON CITY – Sumagmamano a mangngalap ditoy ti nagsagrap iti pannakalugi gapu iti panagpatay dagiti tarakenda a lames kadagiti lapat ken karayan a nakaipupokanda.

Iti pannakiuman ti DZTP Radio Tirad Pass ken ni  Elmor Leano, agdama a city agriculturist iti siudad, intudona ti panagbara ti sangalubongan a makagapu iti panagpatay dagiti lames.

Kinunana a gapu iti agtultuloy a panagbara ti tiempo, nangruna iti daytoy a kalgaw, agraman ti panagatab ti danum iti baybay ken ti kumidkiddit a danum-tamnay, dita nga agpatay dagiti taraken nga ikan kadagiti salin a danum gapu ta maibusanda iti oksiheno nga angsenda.

Iti Candon City, nagpatay dagiti taraken a malaga, bangus ken tilapia iti karayan iti barangay Patpatta Primero ken Patpatta Segundo, Darapidap ken dadduma pay a coastal barangay iti daytoy a siudad.

Di pay ammo ti dagup ti pukaw dagiti mangngalap gapu iti panagpatay dagiti tarakenda a lames.

“Masapul a kalapendan dagiti tarakenda a lames ken saandan nga yuray pay iti semana ti panagburakda tapno makasubbotda kadagiti gastosda,” imballakad ni Leaño kadagiti agtartaraken iti lames.

Kinunana a nalaka a maapektaran dagiti malaga ken bangus agsipud ta iti salin a danum wenno iti naglaok a danum-baybay ken tamnay ti pagdakkelanda ket no kastoy a tiempo a kumiddit ti tamnay, dida makasapar iti apgad nga agtungpal iti panagpatayda..

Ngem iti sanguanan ti balakad ti city agriculturist, sumagmamano a mangngalap nga addaan ti lapat saan pay a nagkutkuti ta iyur-urayda iti idadateng ti semana a panangkalapda kadagiti lapatda agsipud ta nanginngina ti presio dagiti ikan a mailako iti daytoy a lawas.