Footer

Ti barikawwet a panagsublim

naukas iti lulonan ti barikawwet
ti panagsublim a segseggaak
ta  nagkaraip idin ti pusota
a pinatapatanta pay iti dinto
mapekka a kawar ti kari
kasla awan mangparnuay ganna
iti innak kenka pannakaipusing
ngem dimteng ti barikawwet
a punganay dagiti sennaay
natikagan kadin dagiti bibigmo
ket kimraangen ti dilam
nagramot kadin dagiti sakam
ta dimon masurotan ti desdes
naikalin iti tanem ni lipat
ti pimmusay nga iliw
awanen ti bara ti umbim kaniak
nalam-eken ti sardam, nalam-ek
lalo no nakiules ti barikawwet
ti panagsublim, ay, tigergerennak
agtigergerak la unay iti lam-ek
ti puraw a rabii…

Daniw ni RUFINO C. DUGAY
Brgy. Paayas, Burgos, Ilocos Norte