Footer

Anaraar iti nasipnget a kabambantayan (Maudi a paset)

NAPATALIAWDA iti likudanda idi mangegda ti anabaab. Da Tata Andong ken dagiti kakaduana! Intuloyda ti naglibas.

Nagsardeng ni Miguel idi makadanonda iti puon ti dakkel a kayo a narakab ti puonna ken nagrungarong dagiti ramutna. Simmalipengpengda iti puon ti kayo. Nagkumegda dita. Awan sintimek. Tinengngelda ti pana-gangesda.

“Agwaraskayo! Kitaenyo ti aglawlaw amangan no addada la dita nga aglemlemmeng!” nangeg da Miguel ken Margarita nga imbilin ni Tata Andong kadagiti kakaduana.

Madamdama, nagsubli dagiti kakadua ni Tata Andong iti yanna. “Awan nadlawmi a karasakas iti aglawlaw, Tata,” nangeg ni Miguel a kinuna ti maysa kadagiti kakadua ni Tata Andong.

“Agpaabagatantayo ngarud bareng no addada dita. Saanda pay a nakaadayo ta masikog ni Margarita,” kinuna ni Tata Andong.

Nakaanges ni Miguel iti nalukay idi makapanaw da Tata Andong. Intuloyda ti simmalog. Dida pay nakaadayo idi makangegda iti karasakas iti asidegda. Linentian ni Miguel ti naggapuan ti karasakas. Maysa nga alingo a kaan-anak ti nakitada. Nagganukgok ti alingo a nangsiput kadakuada. Simmiasi da Miguel iti dalan.

Intuloyda ti simmalog. Nakadanonda iti karayan a nakaad-adu ti alimatekna. Bimmallasiwda iti bangir a takdang.

Linentian ni Miguel ti bagida. Inunana nga inikkat dagiti alimatek a kimpet iti gurong ken luppo ti asawana sakbay nga inikkatna dagiti kimpet iti bagina.

“Aginanata pay ket napalalo a bannogkon,” kinuna ni Margarita.

“Adda gukayab dita masungad. Idiayto ti paginanaanta,” insungbat ni Miguel idinto a kinibinna ni Margarita.

Impatarengtengda ti nagna. Sarsarapaen ni Margarita ti tianna. Nakadanonda iti wangawangan ti gukayab. Linentian ni Miguel iti uneg idi makastrekda. Nabuak dagiti panniki a nagapon iti uneg. Nakigtot dagiti dua idi agsasaruno dagiti panniki a rimmuar iti gukayab. Nagsublida iti wangawangan ti gukayab. Dita ti naginanaanda.

Nanemtem ni Miguel idi makaala iti rutruting ken sangsanga ti kayo a naidaknir iti ruar.

“Aginanakan,” kinuna ni Miguel a silalailo iti asawana. “Siguro, nagsublin dagiti kumakamat kadata iti hideout.” Nagrukob. Inagkanna ti asawana a nakapungan iti luppona.

Rimmidep ni Margarita. Nagbantay ni Miguel. Nakasagana ti armalitena idinto a nakaturong dagiti matana iti ruar ti gukayab. Amano a paltoganna no adda man tulisan nga agpanggep a sumrek.

Bayat ti panagbantayna, nagay-ayam iti panunotna daydi ipapanda panagtakaw kada Tata Andong iti balay ni Mr. Villaroman a baknang a lakay iti kabisera ti Santa Veronica. Nakayawan ti rikna ni Miguel iti nagsaway a kinapintas ni Margarita a balasang ti lakay. Intalawna ti balasang.

Insang-at ni Miguel ti balasang iti bantay. Iti kaadda ni Margarita iti bantay, inan-anusanna nga inarem agingga iti napagtinnagna ti rikna daytoy. Nagkasarda. Ni Tata Andong ti nangannong iti kasarda.

“Ania ti nakaumayam ditoy bantay ken kasano a naisurotka kadakuada idinto nga ammom a managdakdakesda, Miguel?” sinaludsod ni Margarita iti umuna a rabii a panagdennada.

“Atiddog a salaysayen, Margarita,” insungbat ni Miguel. “Ngem saanen a rumbeng a maammuam pay ti nalidem a paset ti pakasaritaan ti biagko.”

Saanen a nagusisa ni Margarita. Namrayanna laengen ti nagsadag iti barukong ti asawana. Nakataltalged ti riknana iti dayta a panagsadagna. Nairidep.

Nagbaliw ti telon ti panunot ni Miguel. Nalagipna daydi binurayrayanna a lalaki a kinasubang ken nangpaltog a nakatayan ni Tata Berning nga amana. Nagkamang iti bantay tapno maadaywanna dagiti pannakabagi ti linteg a mangkemmeg kenkuana. Nasagangna ti bunggoy dagiti tulisan nga ipanguluan ni Tata Andong. Simmurot kadakuada.

AGLAWAGEN. Riniing ni Miguel ti asawana tapno ituloyda ti agdaliasat. Apagruarda iti gukayab idi mataldiapan ida da Tata Andong ken dagiti kakaduana nga adda iti tuktok ti bantay a naggapuanda. Nagdardaras dagitoy a simmalog.

Nakita da Miguel ken Margarita dagiti tulisan iti ballasiw ti karayan. Insagana ni Miguel ti armalitena idinto a nagarudokda a nangtaraigid iti karayan.

Kinitana ti ungto ti karayan bareng no addan a sumungad ni Col. Ilustre ken dagiti pasurotna a polis nga umay mangsukon kadakuada iti dayta nga isusukoda ken ni Margarita.

Sumanengseng dagiti bala iti uluanan ken sikigan da Miguel. Pagammuan, naapput ni Miguel ti bakrangna ket nadaleb. Nagsayasay ti dara iti sugatna. Natina iti nalabaga ti karayan.

“Miguel!” Imkis ni Margarita idi makitana ti asawana a nadalupo iti karayan. Inasitganna. Binatakna.

“Ituloymo ti aglibas, Margarita. Siak ti makaammon kadakuada,” kinuna ni Miguel nga agmusmusiig iti saem ti sugatna.

“Saanka a mabalin a panawan a kasta ti kasasaadmo, Miguel. Adda sinapataanta a dita agsina. Makirangetta agingga iti kanibusanan,” kinuna ni Margarita sa nagpideg iti bato a paglinglingedan ni Miguel. Insaganana ti armalite a naikaratay iti abagana.

Inirutan da Miguel ken Margarita dagiti paltogda. Sinirigda dagiti umas-asideg a kabusorda. Madamdama pay, awanen ti aridenggan iti panagkapanakpak ti kanalbuong a nangbeltak iti kinatalinaay dayta nga agsapa.

Kellaat, nagsikal ti tian ni Margarita. Di mabayag, rimmuar ti danum ket nagayus iti sellangna.

“Miguel, agpasngayakon!” kinuna ni Margarita.

Insardeng ni Miguel ti nakipinnaltog kadagiti kabusorda. Inasikasona ti asawana.

Nakaasidegen dagiti kabusor iti ayanda. Naalikubkoben ni Miguel.

Pagammuan, nagbusi dagiti igam nga aggapu iti abagatan. Sangapangen a polis nga impanguluan ni Col. Ilustre!

Nadara ti ranget. Adu ti narsing a tulisan. Imbilin ni Tata Andong ti panagsanudda.

Kagiddan ti panagulimek dagiti paltog ti panagallangogan ti nasinggit nga ibit ti nalungpo a maladaga a lalaki nga impasngay ni Margarita.