Footer

Ti daniw ti ina a daga

nangayed ti tunggal isasangbaymo

ta ikanta ken isala dagiti turit ti main-iniin nga isasang-atmo,

pagdidinnamagan met dagiti bulong dayta a kinapintas

saan ngarud a magawidan ni Angin ti agpaswit a sigaganas.

Ti Daniw ti Ina a Daga

nangayed ti tunggal isasangbaymo
ta ikanta ken isala dagiti turit ti main-iniin nga isasang-atmo,
pagdidinnamagan met dagiti bulong dayta a kinapintas
saan ngarud a magawidan ni Angin ti agpaswit a sigaganas.
naruay nga isem matimud kadagiti rupa
sennaayanda man ni Dagaang, saan a mapukaw ni Regta.
ti lawagmo, silawda iti mangliwengliweng a dalan
mangitunda, narungbo ken nakainanama a masakbayan.
bara dagiti agekmo, ganasek a simsiman
in-inutek a bingayen sakonto iganagan
tapno ti amin ket mairanud, mapasayaat
ken mariknada, ayatmo a di agressat.
ngem dinamagmo  kadin no apay a kumleb ti tao no awanka?
no apay nga agsawar dagiti kurarapnit no didaka makita?
no apay a diak maanawa dagiti andidit nga agaariangga?
ken apay a lumung-aw dagiti amor tunggal agsapa?
pis-itek man ti agarimasa a lua
tunggal dumteng ti kanito nga inka panagpakada
diak gamden nga igawidka, situtulok ‘toy riknak a maulila,
ta daytanto met laeng agekmo ti mangriing kaniak inton agsapa!