Footer

Ti Rangtay Iti Dulon

“ANAK, iti kaanoman, dimonto baybay-an ti adim,” daytoy ti bilin ti amada sakbay a pimmusay. Immuna a pimmusay ti amada.

Duada laeng nga agkabsat nga anak ti baknang a nalawa ti dagdagada. Nalawa ti piskeriada. Napigsa ti construction ken electrical suppy a negosioda. Ni Tony ti inaunaan. Maysa a nalatak ken nalaing nga inhiniero.

Ni Marlon, saan a nakaturpos iti kursona ta iti laksid nga adda kapkapuy ti utekna, balliodong.

Gapu iti bilin ti ama, inkapilitan a tungpalen ni Tony ti karina iti amana nga iti kaanoman, saannanto a baybay-an ti adingna.

Ti dakkel a balayda ti pagnaedan ni Marlon, baro pay iti edadna a tallopulo ket lima. Nangipatakder met ni Tony iti bukodna a balay idi nagasawa. Addaanen iti tallo nga annak.

Tapno saan a madukotan ni Marlon, pinusgan ni Tony nga isu iti mangaywan iti motor pool ti Mendoza Engineering & Construction Services. Sinuelduanna daytoy iti nalablabes nga iti rumbeng koma nga awatenna.

Mapan amin iti sugal ti dakkel a sueldo ni Marlon. Sipud pay ngamin naipatakder ti casino iti kabisera, kanayon a mapan makisugal. Kanayon met ngarud a maabak.

“Isardengmon dayta nga ar-aramidem. Daddadaelem ti kuartam ken bagim kadayta a sugal!” impatigmaan ni Tony.

Agsipud ta naabak manen iti casino kadayta a kassangpetna, saan a nagustuan ni Marlon ti insao ti kabsatna.

“Bingayentan ti tawidta,” kinunana. Saan pay ngamin a nabingay ti sanikua ken negosio a pinanawan dagiti dadakkelda.

“Ta ania a rason?”

“Tapno saannak metten a pakibiangan iti kayatko a mapasamak iti kukuak!”

“Tapno burborem laeng iti sugal ti nabayag nga impundar dagiti dadakkelta?”

“Ti tawid ket tawid!”

“Ket no diak itulok?”

“Ti abogadok ti kasaomon. Tinton korte ti mangeddeng iti pannakaguduana.”

Maamak man ni Tony a burboren laeng ni Marlon iti sugal ti pinundar dagiti dadakkelda a sanikua, awan ti naaramidanna. Karbengan ni Marlon ti agtawid iti napanawan ti amada.

Isu a ginuduada ti sanikua.

Kas iti ninamnama ni Tony, inlako ni Marlon dagiti bingayna ket napanna binurbor iti casino.

“Saan a maikanatad dayta nga ar-aramidem!”

“Saanak a biangan. Ammok ti ar-aramidek.”

“Barisuwengka a talaga! Awan ti inaramidmo a nasayaat bayat ti panagbiagmo! Isu siguro a nasapa a natay dagiti dadakkelta gapu iti dayta a kinabangadmo!” nakapungtoten ni Tony.

Gapu iti pungtot ti inaudi iti manongna, pinakalina ti nagbaetan ti solarda. Nalawa ken nauneg a kanal iti dulonda. Adu a grader, backhoe kada bulldozer ti nagkali. Inaramidnan a dakkel a kali ti dulonda nga agkabsat.

“Minamauyong ti ar-aramidem! Mangibabainka!” kinuna ni Tony.

“Tapno dikan makaumay ditoy balayko tapno pakibiangannak!”

Naamiris ni Tony nga awan ti nasayaat a banagen ti pammagbagana iti kabsatna.

“Baliwam ti istratehia, lakay…” balakad ni Clarisse ken ni Tony.

“Ania ti kayatmo a sawen?”

“Kasaritam laeng. Dimo pagungtan.”

“Di ngarud dumngegen. Baybay-ak man laengen. Makaammon iti biagna.”

Inlako ni Marlon ti kaaduan a sanikuana. Ti laeng balayna ken ti nagsaadanna a daga ti imbatina.

“Kayatko a pagsugalan dagiti amin a casino ditoy pagilian…!” kinunana.

Ket naguper kadagiti sugalan. Nabayag a saan a nagawid. Agingga a naibus ti kuartana. Insaldana ti balay ken lote a dinakkelanda nga agkabsat.

Dina napanunot a no maremata daytoy, awanen ti paggiananna,  agkatangkatangton iti kalkalsada a mabisbisinan, nga awan ti maturoganna a nasayaat no di karton wenno yiladna lattan iti karuotan dagiti parke, ket agbalin a  napobpobre pay ngem bao ti kaiyariganna.

(Maigibusto)