Footer

Bio-N mixing plant, napataud iti I. Sur

STA. MARIA, Ilocos Sur – Maysa a planta nga agpartuat iti ganagan a manamnama a makatulong a mangpaadu iti produksion dagiti mannalon ti naluktan iti Ilocos Sur Polytechnic State College (ISPC) ditoy itay nabiit .

Inlawlawag ni Dr. Ricardo Raguindin iti ISPSC a mapartuat iti planta ti ganagan a BIO-N a makatulong a mangpaadu iti apit dagiti mannalon iti mais, pagay ken natnateng. Maysa a pulbos ti Bio-N ket agdagsen iti 200 a gramo ken addaan iti dua a klase iti bacteria a naggapu iti urat ti talahib.

Inlawlawag ni Raguindin nga addaan iti kabaelan dagitoy a bacteria nga ag-recycle iti angin a nitroheno a maysa kadagiti kangrunaan a kasa-pulan ti mula tapno rumangen.

“Maaddaan ti mula a naabunuan iti Bio-N iti ad-adu nga urat a mangsisip iti sustansia iti daga,”  kinuna ni Raguindin idinto nga innayonna a gapu iti daytoy, rumangen ti bulong ken sanga ti mula ket umad-adu ti bungana.

Makainut pay dagiti mannalon no agaramatda iti Bio-N, segun ken ni Raguindin.

Inlawlawag met ni Dr. Ida Dalmacio, agdama a director ti National Institute of Molecular Biology and Biotechnology (BIOTECH), a nakabase iti University of the Philippines, Los Banos College, Laguna, a nabayag metten a napartuat ti Bio-N ngem kadagitoy a gundaway laeng a maikkan iti importansia gapu ta iti masansan a pannakaaramat iti kemikal a ganagan, tumangtangken ti daga ket agtungpal a bumasbassit ti maapit.

Babaen ti Bio-N, mapasubli ti sigud a kasasaad ti daga ket pumintas ti apiten dagiti mannalon, kinuna ni Dalmacio.

Malaksid kada Dalmacio ken Raguidin, immatendar iti nasao a programa ni ISPSC president Alejandro Directo, Mayor Allen Singson ken Mayor Edgar Florendo, dagiti empleado ti Provincial Agriculture Office ken dadduma pay a bisita.