Footer

Dati a Mayor ti Vigan City Eva Marie Medina, awan kasangona iti panagsublina iti politika

VIGAN CITY – Awan ti timmakder a sumango ken ni dati a Mayor Eva Marie S. Medina iti panagsublina manen iti politika kalpasan ti tallo a tawen a panaginana.

Kas ninamnama, impabus-oy ni Mayor Ferdinand C. Medina nga agsubli ti asawana a mangituloy kadagiti inrusatna a proyekto.

Katiket met laeng ni Medina ni Vice Mayor Franz Ranches iti babaen ti Partido Lakas-CMD. Agsangoda ken ABC President Constante Benzon a nangipila iti kandidaturana para iti kinabise mayor kas independiente.

Kabayatanna, agpailayon iti babaen met laeng ti Lakas da Konsehal Audie Agdamag, Konsehal Ever Molina, Konsehal Andres Adriatico, Konsehal Maximo Alves, ken Konsehal Hermenigildo Apelin, Konsehal Loreto Quibilan ken Konsehal Henry Formoso idinto a padasen dagiti dati a konsehal a pakairamanan da Lourdes “Lulu” Baquiran, George Villanueva ken Benedicto Jose Verzosa ti agsubli iti puestoda kas konsehal.

Saanen a ti Vigan ti pagkandidatuan ni Konsehal Germie Singson-Goulart agsipud ta impilana ti kandidaturana a para mayor iti Caoayan, katiketna ni incumbent Vice Mayor Gemma Padaong.

Kabalubal ni Goulart ni incumbent Mayor Mario Tugade.

Sumagmamano nga independiente ti nangipila iti kandidaturada para konsehal iti siudad a pakaibilangan da Nestor Gutierrez, Manuel Javier, Dominga Ramirez, Robert James Singson ken William Villanueva.

Iti Candon City,  adda timmakder a kasango ni Mayor Allen Singson nga independiente a kandidato, ni Wilfredo Virocel, ngem unopposed ni Vice Mayor Nestor Itchon a katiketna.

Naitiket iti Lakas-CMD para konsehal da Rhodana Abrero, Julio Acance, Fredelino Balagot, Francisco Bona, Jr., Osias Diasen, David Gacusana, Erlinda C. Gocho, Alfonso Singson, George Valdez, ken Rosario Villalobos.

Uppat nga independiente ti nangipila met iti kandidaturada para konsehal: da Ruben Acal, Vicente Balbin, Victor Gacusan, Florendo Mangasar, ken Aristeo Valdez.

Comments are closed.